韓國師奶殺手裴勇俊，前幾日去日本宣傳寫真集時搞出大混亂，令十個師奶受傷，其中重有師奶俾佢架車輾過，俊哥事後表示心如刀割，重喺記招上眼濕濕。不過前日佢又再重現招牌笑容，重話唔會因為呢件事而怕咗去日本，睇嚟俊哥嘅師奶fans可以放下心頭大石。
俊哥前日下晝接受四間日本傳媒嘅電視訪問，佢話自己對fans受傷嘅事感到難過，佢話：「佢哋受傷令我好擔心，但如果大家嘅傷冇事嘅話，咁我都冇事，我重感覺到一份愛情嘅存在。」有記者問佢會唔會為咗呢單嘢而唔敢再去日本？俊哥就話：「日本fans畀我嘅愛，我唔會忘記，我唔會因為呢件事唔去日本。」之後佢重同fans約定下次再見面。不過俊哥今日就會離開東京，正所謂臨別依依，睇怕成田機場又會發生大混亂嘞。
另外，韓國兩大巨星李秉憲同崔智友主演嘅電影《誰都有秘密》，前日喺東京同大阪舉行首映，雖然憲哥同崔智友身在漢城，未能親身去日本，不過佢哋前日透過衞星視像會議，答謝喺六本木VirginTOHO戲院裏面約三百位嚟睇首映嘅fans，唔少fans見到偶像即時用韓文大叫「我愛你」，憲哥重話：「見到大家嘅反應咁好，我好開心！」