久未在港露面的張栢芝，前晚在灣仔會展出席環球十周年演唱會時一上台即被觀眾噓，但仍有歌迷獻花給她，未知是否因經常在內地，栢芝竟以國語向歌迷道謝。而獻唱了一曲《忘了忘不了》的栢芝，表示將此曲送給張國榮和黃霑，希望大家不要忘記他們。
張栢芝說：「我錄緊新歌，亦有填詞，講我十八歲到𠵱家嘅心聲，包括家庭、感情方面，我讀書少，文筆唔好，只可以將意思寫出來，再畀填詞人執，我最近睇好多有深度嘅書，亦狂睇經濟書，希望遲啲減輕工作量搞生意，我已經有idea，只要投資三、四十萬，每個月可以淨賺三十萬。」
張栢芝又表示曾與家人開會，讓他們明白日後自己會為興趣而工作。栢芝說：「有雜誌話我細佬燒銀紙，其實佢哋係用自己錢，佢哋一個月都可以搵到幾萬，但唔穩定。娛樂圈花冇百日紅，壓力亦大，所以我要為我以後嘅人生爭取，𠵱家有得做就做，善事廣告就做，我出唱片都係因為鍾意唱歌，唔係想攞獎。」
採訪：駱華齡
攝影：仇志德