【本報訊】孩子說話發音不正，父母切勿過份緊張予以即時糾正，原來發錯音及串錯字都是語言發展中的自然過程，小孩在成長期間會逐漸領會；若家長狠狠打擊小孩的錯處，反而會影響他們的說話動機。有心理治療師提醒家長，在一般社交場合，應讓孩子多與外界接觸，友人提問切記不要代小朋友回答，即使答案「唔夠禮貌、唔得體」也不要過份緊張。 記者：張嘉雯
「小朋友講句『Hi』，你就話佢無禮貌，要佢叫番叔叔，叫晒所有人，幾乎要做晒指定動作，先可以自由活動，小朋友就會唔鍾意講嘢！」心理治療師潘偉智昨在教材供應商SmartKid'sClub舉辦的講座上，向初為人父母者，傳授培育語言技巧的方法。他認為，父母最重要是多與子女溝通，多與子女談話，鼓勵子女自由發言，不要處處設限。
「到某個階段，小朋友會講吓屎屎尿尿呀，千祈唔好話唔畀佢講，因為佢哋對呢樣嘢產生興趣，家長其實可以藉呢啲理解佢嘅世界。」潘偉智解釋，鼓勵孩子說話有很多方法，包括遊戲、扮演活動、唱歌、講故事等，家長在平日說話時要多用內容豐富的詞語，再配以表情，讓孩子更易理解句子的含意。
他又提醒家長，千萬不要在幼童面前說粗言穢語，否則孩子也會容易沾上說粗言的惡習。
在回應孩子時，家長應多微笑及點頭，讓孩子感覺輕鬆及沒有壓力，細心觀察幼兒的身體語言動作，「好似佢望吓出去咁，有啲父母太無微不至，即刻抱佢出去，其實應該畀佢一個講嘅機會，問吓佢係咪想出去呀，等佢開口講吓。」
潘偉智又建議家長，在平日提問時，嘗試多用六個「W」出發，例如甚麼（What）、哪裏（Where）、何時（When）、為何（Why）、是誰（Who）及哪個（Which），利用開放式的問題帶引孩子分享，「唔好話設有乜預期答案，乜係啱、乜係唔啱咁，等佢哋多啲表達。」在對話以外，平日亦可給子女多看有趣書籍，在家中設圖書閣，讓子女使用，又可為子女製作他們的個人或家人的相簿，增加分享話題。
他並提醒家長要以母語對話，「有啲父母自細同細路仔講英文，但係其實大部份父母講嘅英文都好生硬，有口音，令到啲子女好混淆。」他認為，孩子只要能掌握母語，日後學習其他語言也較容易。