領匯（2382）上市，肯定賣個滿堂紅，爆晒燈。領匯收入以租金為主，收租股如希慎（014）與鷹君（041）受到刺激，上禮拜分別急升8.1%與7.1%，恒基發展（097）與恒隆地產（101）走勢亦都靚靚。
年底個市，有機會創新高，恒指見萬四點唔係問題，睇吓係14400抑或係14600，而帶動大市嘅，最有可能係地產股。
新地C輪：地產股中，新地（016）嘅租金收入比重唔低，希慎與鷹君急升，冇理由新地唔郁。新地上禮拜5個交易日升得0.50元咁大把，亦遠遠慢過長實（001）嘅3.75元升幅，啲C輪一周埋單冇郁到，更加值得趁低撈貨。
新地C輪例牌對象係2252與2276，2252明年2月夠鐘，溢價0.9%，槓桿率15.1倍（有效10.4倍），引伸波幅21.7%。2276明年3月到期，輪價51仙，溢價2.0%，槓桿率15.4倍（有效9.7倍），引伸波幅22.7%。兩者𠵱家比較，都係2252抵買啲。2165數據亦唔錯，但交投較疏。
恒地C輪：地產股掂檔，恒地（012）亦會有運行。但炒恒地C輪，冇炒新地C輪與長實C輪咁過癮，因為佢哋交投唔多，買賣要畀多啲耐性。但講到數據，恒地C輪則唔錯。
恒地C輪4600明年4月到期，輪價41仙，溢價2.2%，槓桿率10倍（有效7.6倍），引伸波幅20.8%。9038年底到期，輪價59仙，負溢價0.7%，槓桿率7.0倍（有效5.9倍），引伸波幅不適用。兩隻輪每隻每日成交金額都係幾十萬。
章盛