李麗珍舊愛、髮型師馬桂燦的太太李靜婷，昨日在七名反黑組探員陪同下召開新書記者會，她聲稱決定出書後，其親友不停受到電話恐嚇，她又表示和友人共投資十多萬出書，有信心明日便可回本。
城中轟動一時的李麗珍、髮型師馬桂燦（Jacky）及其太太李靜婷的三角不倫戀又有新進展，昨日馬太在七名反黑組探員陪同下在旺角士丹福酒店舉行《珍人真事》新書記者會時，表示自決定出書後，其親友不停接到恐嚇電話，更有人在Jacky的電話留言「你個仔死梗」，警方重案組現時正在調查，問誰是留言者，馬太直說：「係怪獸！」她又指之前髮型屋俾大漢圍堵，帶頭的是怪獸大佬。
馬太稱出書期間波折重重，印刷商收到通知「邊間印就掃邊間」，而之前便有兩、三間印刷商表示不敢替她印書，馬太說：「要斬我就俾佢斬一刀咯，𠵱家個仔有警方保護，如果為咗出書呢件事而搞細路仔，咁就人人得以誅之！我出書係因為有人太過份，Jacky對佢咁好，咁愛佢，佢都搵人打佢踢佢，連攞番衣服鞋襪都唔畀，我嘅出世紙都喺佢間屋，都唔畀我攞。」
馬太一再強調書中所寫全部真人真事千真萬確，並澄清之前指是電影橋段是為了維護老公，她說：「如有人覺得我寫嘅嘢係假，可以告我誹謗同出禁制令，我個仔同菲傭，同某人嘅菲傭都可以做證，佢哋已經去咗律師度做誓章，愈係迫我愈要寫出來。之前我個仔想食Pizza，我身度冇錢，某人竟然叫我個仔去乞，我先有決心要寫出嚟。」
該書共分為上下集，下集會於下星期推出，售價每本二十八元。馬太稱下集將會有更多相片，包括有人打人及做不文手勢，大多是她從手提電話的短片中翻印出來，問她可會有裸露的相片，她說：「我唔覺得呢啲係乜嘢。」
Jacky現時已被法庭頒布破產令，馬太稱不擔心贍養費問題，因她每個月開支只需三萬多元，她更稱Jacky現時勤力工作，每月搵十多萬絕對不是問題。問她出書想賺多少，她說：「當然愈多愈好，我同朋友夾份投資十幾萬，聽日重有六萬尾數要找，我有信心星期一已經賺到回本，我自己鍾意寫人性嘅部份，但相信讀者鍾意色慾同三角關係多啲。」
馬太又稱家人曾埋怨她出書，而Jacky初時亦反對，並說：「𠵱家佢唔出聲我就當佢支持我，我相信佢唔會睇，但我會畀個仔睇，反正佢好多時在場，好多嘢都知，但阿仔話等暑假有時間先睇。」看來馬太似乎忘了該書不能出售給未滿十八歲的人士或給予該等人士閱讀。
採訪：張俊銘 攝影：仇志德
