CAPCOM好耐都冇推出格鬥Game，對上一次已經係三年前嘅《CAPCOMVSSNK》，好多格鬥機迷都好懷念阿龍同春麗。暑假推出街機版嘅《CAPCOMFIGHTINGJam》（下簡稱CFJ），就將呢班經典人物再次聚首一堂，更加入CAPCOM五大動作Game嘅人物同系統，而今日PS2移植版亦已派貨，機迷又可開波打餐飽！
記者：徐影龍
其實CAPCOM三年前已公布過《CFJ》，似《街霸EX》咁用上全3D表達，重係E3上搞過試玩，可惜計劃最後都係胎死腹中。點知到今年年中，《CFJ》再次蒲頭，改番傳統2D形式登場，兼且同時發表街機版及PS2版，各路格鬥人馬再次燃起「打餐飽」慾望，令到《CFJ》人氣一時無兩。順帶一提，港版《CFJ》附送攻略特典DVD，日本要訂先有㗎！
遊戲以CAPCOM多位出名動作明星作生招牌，台柱阿龍、春麗再次粉墨登場，未計最後Boss及真．豪鬼兩名隱藏人物，一共有五大系列角色，加埋一名原創靚女角色INGRID，合共21人，雖說以現今格鬥Game標準計唔算多，不過大家反而可集中操練幾名角色，好過半桶水。規則跟《CAPCOMVSSNK》一樣打2On2隊制，唔同嘅係同一角色可出場兩次，唔會硬性規定先鋒打完就到大將，即係大可操熟一個橫行都得。系統方面，引入五大作品各自精采嘅系統，每樣都有優劣地方，如《街霸III》超強嘅
Block擋格系統、《街霸Zero》嘅自創連續技OringianlCombo、《魔域戰士》嘅ChainCombo等，最特別係所有角色只可揀番對應系統，如阿龍唔可以玩ChainCombo、追打攻擊，Sakura又唔可用Block擋格等，個個安份守己，有別於其他溝亂Game，對各自作品有心得嘅玩家，相信好快便可上手。
既然《CFJ》以作品大溝亂為賣點，難免有人會將之前嘅《拳皇鬥街霸》作比較。筆者本不抱太大期望，不過實際玩落又幾有驚喜喎，起碼唔再係互鬥幾十Hit連續技，又或鬥一招了超屈技，捉心理再次成為重要元素，打起上嚟有意思得多。雖然遊戲角色嚟自五大作品，不過都有唔少修改，當中以《街霸II》角色最為明顯。以主角阿龍為例，加入如《超級街霸II》嘅真空波動拳尚算講得通，不過卻多了《街霸EX》才首次登場嘅真．昇龍拳，向前中拳、重拳變成2Hit特殊技，卻不可Cancel必殺技，最慘係抽走防守能力極高嘅真空龍捲旋風腳，嚴格嚟講，阿龍只算《街霸II》人設，所使招式簡直集歷代之大成，對老手嚟講的確增添不少新鮮感，反面睇係幾款作品嘅系統擺埋一齊，當中仍存有如《拳皇鬥街霸》嘅平衡度問題。
隨住《CFJ》推出，將有兩款相關周邊登場；除咗下星期先返貨嘅《CFJ》記憶卡，重有周邊名牌HORI推出嘅專用JoyStick，呢支RealArcadePro用足真材實料，全部零件、按掣跟街機用嘅一模一樣，最正係支「的」嘅手感，由靈敏度到鬆緊度都好有街機Feel，加上金屬底座夠晒重，放喺台面玩都唔會移位。順帶一提，呢支JoyStick附送三張街機用嘅出招貼紙，學機舖咁貼出嚟都幾過癮！
CAPCOM跟《GameWatch!!》及《FightClub》名為CAPCOMFIGHTINGJAM2004OFFICIALTOURNAMENT，重分開街機組同PS2組，冠軍更可獲得$1,500現金獎及街機控桿RealArcadePro，想一展身手攞齊獎金同獎品，就要快快操熟同報名喇。
遊戲類型：格鬥
對應機種：PS2
遊玩人數：1至2人
開發商：CAPCOM
(c)CAPCOMCO.,LTD.2004ALLRIGHTSRESERVED.
報名查詢：
售賣點：DreamStore
電話：25753285
地址：灣仔東方188商場256號舖