著名監製蕭笙昨日凌晨因肝癌惡化病逝，他生前監製無數經典劇集，當中曾一手提拔陳松伶主演劇集《天涯歌女》，令她一炮而紅。身在新加坡的松松得悉對方的死訊後，感到很難過，松松更透露年前曾邀請一位僧人為蕭笙治癌，一度令他奇迹好轉。
著名電視監製蕭笙於昨日凌晨因肝癌惡化引致併發症病逝，由於他縱橫娛樂圈逾三十年，監製過無數經典劇集，故其死訊令圈中人甚為惋惜。
蕭笙於八九年監製劇集《天涯歌女》，該劇由陳松伶和黎明主演，劇集播出後即令首次拍劇的松松一炮而紅，故蕭笙亦稱得上是松松的伯樂。正身在新加坡拍攝劇集《二分一緣份》的松松，昨日接受本報長途電話訪問時，對蕭笙的死訊甚為愕然。她表示當時尚就讀中學，雖然已晉身樂壇，但沒有拍劇經驗，直至有次她因燙傷腿部入院治療一個月，其間蕭笙曾到醫院探望和力邀她主演《天》劇。
松松說：「嗰時我成個月都要瞓醫院，出院又要返學，蕭笙叔好想我做，佢肯各方面協調，重出個電話畀我問功課，又畀我放學後至開夜廠拍劇。」
松松透露，於年多前已知道蕭笙患癌，她更介紹了一位僧人為蕭笙治病，她說：「嗰位出家人喺香港嘅醫院度幫蕭笙叔把脈，開咗啲藥方畀佢，佢好快就冇事，重同我去食飯飲茶，真係好神奇。之前蕭笙太太話蕭笙死過翻生，就係講呢件事。到噚日我知佢有事，重想搵嗰位出家人再去睇吓佢，點知已經聽到呢個消息。」松松表示因仍須趕戲，料趕不及出席蕭笙的喪禮。
此外，鄭伊健得悉蕭笙離世後十分難過，他形容對方是自己的大恩師，當年其首部擔任男主角的電視劇《月兒彎彎照九州》便是出自阿叔（蕭笙）之手，伊健說：「當年無綫用人好穩陣，但蕭笙支持用新人，唔係我冇機會做男主角，我可以出碟都係因為佢，係佢叫我返公司試鏡，陪蔡濟文去試鏡嘅唱片公司人員見到我就叫我去試音，我先有得出碟。」
而尹天照曾與蕭笙合作拍攝亞視劇集《新仙鶴神針》和《天蠶變之再與天比高》等，昨他在電話中說：「阿叔佢好好人，有容人之量，我哋成日都飲茶，每次都好深刻。」
李香琴昨則在電話中說：「好惋惜，我六幾年拍緊電影時已經識佢，佢太痛苦嘅話都冇辦法，人梗要行呢條路嘅。」
陳敏兒昨日到港台出席活動時表示對蕭笙去世感到突然，她說：「之前我有留意佢嘅新聞，但好耐冇同佢聯絡。記得佢拍《太平天國》時搞咗個祈禱會，可能受佢基督徒嘅囝囝影響。」
採訪：朱倬誼
