為紀念一代鬼才黃霑，無綫昨晚在將軍澳製作節目《獅子山下念霑叔》，由汪明荃和顧紀筠擔任司儀，嘉賓則有鄭少秋、葉振棠、關菊英、黎小田、呂珊、黃偉文、雷頌德和張偉文等。
顧紀筠原本做完台慶便不再做司儀，但今次為向霑叔致敬而再作馮婦，她說：「佢同林燕妮一齊時，我哋係鄰居，一次我喺樓下一路洗車一路唱歌，霑叔經過話『連你都唱歌，好多人冇得撈囉』。之後佢最潦倒時搬咗去灣仔舊樓，我同佢喺亞視主持奧運。喺人生最低潮時，佢重好豪邁咁話『有林青霞請我食飯，有顧老闆做我司機』。佢亦有同我講愛情，佢話鍾意一個人時，係連對方半夜屙尿嘅聲，都聽落似音樂。」
而容祖兒昨預早錄影節目，並獻唱《明星》一曲。祖兒表示演唱時憶起師傅羅文、梅艷芳和張國榮等已故巨星，她亦相信霑叔現已變成天上的星星傾聽她唱此曲，她說：「我做新人時，霑叔竟然請我上去電台節目訪問，好少主持會請新人。」
另外，鄧梓峰對於黃霑逝世說：「華娃係我老婆阿姨，所以我一直叫佢哋做阿姨同姨丈，不過我都好耐冇見過姨丈。我記得一年前同佢食過飯，之後就好少接觸，所以佢入院我都唔知。」
採訪：王崇穎
攝影：陳慧安
