運輸署噚日有幸運車牌拍賣會，吸引咗三百幾人到場競投心水車牌號碼，其中包括有傳早前買咗架本田CIVICEP3辣車嘅商台副主席俞琤亦有捧場。雖然場內唔畀傾電話，但俞小姐一於好少理，喺場內細細聲傾咗成四、五次電話，可能係公眾人物關係，在場運輸署職員都冇阻止。俞小姐最後乜都冇投，坐咗個幾鐘就走人，佢話因為好耐冇去車牌拍賣會，所以先嚟湊熱鬧，而唔係為新車買車牌喎。
八方喺場裏面又見到另一對熟悉面孔，就係亞視新聞部嘅靚女主播陳佩琳，同埋喺無綫新聞部做嘅老公許方輝，佢哋一心拍住拖嚟投車牌，重用咗一千蚊投到個LS1020車牌㖭。
平日上慣鏡嘅兩位同業好似唔係好慣對住相機，八方一舉機，佢哋就即刻低頭傾偈，好似唔係好想見報咁，投完個牌就急急腳辦理登記手續走人。八方問許生個車牌有冇特別意義，係唔係老婆生日日期，但許生可能因為係同行關係，所以話唔方便做訪問喎。
講番個拍賣會，其實有好多得意車牌，好似JJ9394（諧音搞三搞四）同FR911（美國9.11事件）等，大家下次不妨到場投牌，順便做吓善事，因為所有收益都係撥晒去獎券基金㗎。
傳真︰2623-9278
電郵︰