最近兩星期睇咗好多電影以外的表演媒介，包括兩個舞台劇，一個音樂劇，四個不同類型的演唱會。再加上平日有大量識嘅同唔識嘅人對住我演講，唔同嘅sales向我搏命推銷，全部七情上面，個個絲絲入扣，演出入木三分。再加上近排準備開新戲要接觸吓啲演員，好似生活在一個被表演者包圍的世界。但係點分別邊個演得好先？
好多人都知道我係演藝學院戲劇系畢業，大部份人都理所當然地以為我係主修導演科，其實我係主修表演科，即係讀完之後應該做演員，本來讀緊嗰陣我都係咁諗，加上平日少照鏡，諗住將來可以做明星重唔發達，可惜讀完之後唔單止搵唔到工，重身形暴脹，變咗個肥仔嘜，惟有向幕後發展。如果我冇記錯我導演科應該係肥佬咗。全靠做咗副導演後遇上幾位良師，教識我好多一生受用的導演技巧。加埋有表演系學過嘅嘢，暫時都重頂得住。
所以近十年來我每日都在研究表演，準備表演，睇人表演中度過。亦經常被問到有關表演的問題，我有個好好嘅小故事——一九八六年，演藝戲劇學院第三屆新生開課，ActingClass第一堂，同學問到底乜嘢叫演戲，毛俊輝老師叫嗰位同學數一數今日有幾多人穿白色鞋，同學數完後答十二對，毛老師話：「剛才半分鐘前發生嘅事，如果現在要再發生一次，就係演戲。」我聽到一頭霧水，唔係數幾對鞋就叫演戲呀？毛老師叫大家幻想吓如果剛才發生嘅情節係一個劇本，老師叫學生數鞋後，學生即答：「十二對。」因為導演叫佢接台詞緊啲而完全忽略了數的過程，沒有將劇本內容變成生活，有個專有名詞叫做「扮演戲。」