拔萃男書院噚晚喺會展搞咗場創校一百三十五周年籌款晚宴，筵開一百五十五席，共有二千人出席，場面墟冚，除咗唔少DB仔出席外，重有高官拱照，包括何志平、王永平、湯顯明同廖秀冬。
男拔為咗興建附屬小學同新綜合大樓，同銀行貸款一億一千萬元，噚晚呢個校慶晚會，就一共籌到約四百萬蚊，真係幫到唔少忙，難怪男拔其中一名校董、立法會議員張宇人鬼咁開心，攞住張佢中五時影嘅相周圍show畀人睇，猛同人講自己以前幾咁靚仔。
已故名大狀張奧偉嘅太太，噚晚就攞咗張先夫嘅珍藏畫作出嚟慈善拍賣，等佢老人家去到天國都可以幫吓母校。
（圖）作為男拔校董嘅立法會議員張宇人，攞住佢讀中五嗰陣嘅相畀人睇，相片左邊個四眼仔就係佢喇。梁祖彝攝
傳真︰2623-9278
電郵︰