麗豐（1125）上星期五俾各方沽盤「行」到實一實，唔肯鬆章。但呢隻股，質地唔錯，咪俾沽家嚇怕，兩個字：「要搞」！
麗豐公布04年業績（7月止），純利爆升39倍去到1.73億元，雖則，年度純利貢獻，幾乎集中喺房地產投資回撥，但要咁諗，麗豐受惠回撥，PE降到7倍，視覺效果好睇好多。又受惠回撥，即係話，呢期麗豐嘅上海熱賣海欣豪園，未乜點入帳，呢股純利增長爆炸力，留番05年度浮現。
再講，麗豐呢期話同姊妹公司豐德麗（571）合作濠江住宅項目，地皮唔係撈粗嘢，但勝在食住澳門概念，何況，估計麗豐每股資產值，家陣坐底1蚊，現價折讓75%，就當買佢資產，係以折讓價買入，有數可圍。以往經驗，沽家對某一隻股壓到實，唔係有大鑊嘢，就係有筍嘢，買佢開大，博重有筍嘢跟尾，再有低位，壓到落0.22元呢期橫行位，重正，到時唔怕買。
天津創業環保（1065）呢勻喺最近8年高位整固，若衝破3.18元阻力，有機會係「澎澎聲」。呢家企業主營污水處理，做到豬籠入水，04年第3季度（9月止）純利1.21億元人民幣，同比增長1.11倍，照睇，04年全年純利上60%增長，冇問題，PE落番單位數。再講，名牌德意志本月中見落場，家陣揸住集團1300萬股，平均價講緊2.78元，天津創業上星期五收市價2.75元，未夠喉。重有係，中國工業發達，環境污染嚴重，污水處理呢一行長做長有，怕且大孖沙現水位先搞作，係放長線釣大魚格局，趁澎澎聲之前，可以收吓貨。
錢雋