又係一年一度恒生同傳媒卡拉OK晚宴嘅日子，副董事長兼行政總裁鄭海泉率領行方一眾高層，跟老記同聚暢飲今晚夜。晚會另一重頭戲，當然係恒生大廚炮製嘅一系列佳餚美點，主打梗唔少得佛跳牆，自從沙士爆發後，心細如塵嘅恒生公關大員，就以呢味集鮑魚、花膠、燕窩球及海參熬煉嘅珍品，代替傳統蛇宴，等賓客先暖暖胃，再氣聚丹田唱個飽。
除咗佛跳牆，菜式重包括清蒸東星斑、花雕嘉美雞、蒜茸焗花蟹，甜品則有桂花紅豆缽仔糕、栗茸西米焗布甸，及薏米蛋白杏仁茶。噚晚重有一味匠心之作，叫洞庭藕盒，大家好記性的話，或會記得環境運輸及工務局局長廖秀冬有次出席公益金籌款活動，都係親手炮製一味類似嘅美食籌善款，恒生大廚將冬冬佳作發揚光大，以饗賓客，真有心思。
傳真︰2623-9278
電郵︰