人人爭說領匯，申領呢隻基金（REIT）嘅基金單位，並不容易，基金Y對左丁山話不如全家填表，等運到，一家大人加埋菲傭，齊齊入紙，希望一人派到一手。唉，得一手，賺得幾多吖？揸一年，得到嘅派息只係三百幾銀，完全冇肉食。
基金Y打算領匯上市後，立即掃貨，但佢又怕人同此心，心同此理，到時齊齊掃貨，搞到股價大幅上升，一啲都唔划算。正是申請怕冇幾多，唔申請又怕冇貨，真煩！佢睇過研究報告，認為領匯除咗派息六厘多點，夠穩陣之外，價錢會有上升空間，因為即使唔加租，呢批商場?停車場在管理人（領匯管理有限公司）包裝之下，仍有增加收益嘅潛力。譬如話，更換一啲租戶，換入一啲朝氣蓬勃，肯搏殺嘅租戶，令商場氣氛有新鮮感覺，加上學習私人商場嘅最低租金或營業額分成，以較高者為準嘅做法，領匯所得租金就會水漲船高。
呢一招，左丁山明白嘅，太古廣場好多租戶就是如此。舉個假設性例子，某舖租金係二萬元或者營業額十二巴仙，舖頭一個月做到二十萬生意，租金就係二萬四千；做到十五萬生意，租金就係二萬，總之舖頭生意越好，業主就越有着數，越係肯花錢、花心思嚟推廣商場。但點樣先至令到商場生氣勃勃呢？
基金Y說：「嗱，置地公司轄下商場，平均年齡二十五年，夠晒老嘞啩？但置地商場久唔久就大翻新，我哋唔覺得佢老。房委會賣畀領匯嘅商場年齡平均只有十四歲，但租戶平均年齡十歲，即係話租戶轉變得比較少，熟口熟面，加上商場面貌歷久不變，市民於是覺得房委會嘅商場有老態，夠老餅，唔願去。領匯管理只要向置地、太古、新鴻基、九倉學番幾招，就會令到商場面目一新㗎嘞。」