自從SQUARE同ENIX合併後，盡收《DQ》及《FF》史上兩款最暢銷RPG，其中《DQ》（勇者鬥惡龍）系列更榮升為日本國寶級RPG，推出前夕例必大排長龍，遊戲商要避戰，小學生逃學買Game更成為社會話題！新作以全3D加卡通貼圖製作，加埋鳥山明嘅人設，簡直恍如睇緊《龍珠》咁過癮！
記者：徐影龍
為免再有𡃁仔逃學買Game，年頭隻《DQV》Remake版已經改為周末發售，今次《DQVIII》亦一樣排喺星期六推出，不過香港照例早兩日有貨，更唔使受排隊買Game之苦。叫得國寶級，賣價亦相當嚇人，日版水貨要成$650，筆者推介買行版，除咗平成百蚊外，重有個中、日對照介面，對出名日文多嘅《DQ》相當之重要。
憑住《DQV》Remake版嘅重製經驗，《DQVIII》終於擺脫上集極之差劣嘅3D技術，就算場景加人物用上全多邊形，遊戲都運行得相當之暢順，大量劇情動畫均由實時運算演繹，初期極之龐大嘅村鎮，左行右行、360度轉換視點，都十分之流暢，甚至穿屋爬樓梯都感覺唔到Load碟，簡直有如當年「玩卡帶」咁爽！
鳥山明再次擔任《DQVIII》人設，好多人物都甚有《龍珠》Feel，如主角似少年版悟飯、村童似杜拉格斯、占卜師更簡直係撒旦先生嘅翻版！配合相當出色嘅卡通貼圖及流暢3D技術，打緊機都好似睇緊卡通片咁精采，最懷念係音樂大師山浩一嘅BGM，令老一輩機迷好有共鳴，愈打愈High！
經典系列太過根深柢固，好難改得令機迷滿意。《DQVIII》喺RPG最重要一環嘅戰鬥系統方面，大膽放棄傳統第一身打法，唔再「震一震」就當出咗招，而係似《FF7》咁衝前去殺敵。雖然咁改法的確少咗舊有嘅味道，不過打起上嚟精采刺激得多，斬殺技及魔法攻擊得以出色表現出嚟。畫面顯示亦有別過往大大個視窗式，敵人、損害數據等放喺背景度顯示，整個畫面感覺更為「闊落」，唔會因視窗而阻礙觀感。
今集新加嘅兩項戰鬥元素，其中育成部份再有修改；每次升等級，都有額外嘅SkillPoint，可重點提升唔同武器嘅熟練度，如狂谷劍技，就可更快獲得相關必殺技，成為別具風格嘅角色。另外還有儲氣提升攻擊力作戰系統，若連續幾回合都儲氣，攻擊可幾何級跳升，對付堅厚裝甲敵人，又或Boss戰都非常實用。
最叫舊機迷放心嘅，就係《DQVIII》變更點眾多，實際玩落都唔覺面目全非，由人設到背景音樂，都仍然好《DQ》，尤其係劇情嘅鋪排，主線清晰唔怕迷失目標，而好多小劇情都頗有心思，如操控葵鼠仔捐窿四圍搵道具、一對兄弟撩主角隻揪！最搞笑係東之塔開門嘅秘密，主角苦苦思量都搵唔到鎖匙，要靠村童解開一幕，簡直令筆者半夜笑咗出嚟！
雖然筆者只係玩咗10個鐘，不過《DQVIII》的確冇令人失望，嗰種屢有驚喜嘅劇情同玩法，絕對係令人「扯住」唔願收機。雖未深入涉足賭場、競技場及武器合成等玩法，不過肯定會如《DQV》般，煲足100小時都未玩得齊所有嘢。
遊戲類型：RPG
對應機種：PS2
遊玩人數：1人
開發商：SQUAREENIX/LEVEL5
售賣點：DreamStore
電話：25753285
地址：灣仔東方188商場256號舖
(c)2004ARMORPROJECT/BIRDSTUDIO/LEVEL-5/SQUAREENIXAllRightsReserved.
廠方同期特別推出一款史萊姆形控制器，表面上係一個史萊姆座枱擺設，反轉一睇，居然重可當埋PS2手掣咁用，真係問你死未！呢個控制器以較軟嘅膠做外殼，圓碌碌好有手感，長時間煲《DQVIII》肯定更有Feel！
