金勞詹果然不同凡響，正當唔少濠江賭業股大散之時，佢隻駿雷國際（070）亦係染指賭業，噚日復牌後股價勁升66.67％，同前日永安旅遊（1189）一早mark高，然後倒跌截然不同，真係老馬有火。
駿雷噚日最高見過4.1仙，收3仙，成交股數12.94億股，金額4071.6萬元。
經紀陳話，唔好以為駿雷係跟風搞賭業，查實人哋早在10月底已經停牌搞呢單deal，江湖傳聞監管機構對佢特別關心，所以搞咗咁耐先至可以復牌，miss咗濠江賭業股最黃金的炒作時間，真係有多少可惜。聽聞駿雷有晒部署，今次以3500萬元入股澳門君怡酒店的黃金時代貴賓廳5％後，重會有動作跟尾，稍後將陸續向外公布。
至於前日好多人輸錢的永安旅遊，噚日就停牌搞先舊後新配股，傳聞永安旅遊以每股2.8仙，配售60億股，集資金額成億六銀咁多，但配售價與停牌前收市價一樣，並無折讓，究竟乜嘢人會要呢？
慕容小初