立法會主席范徐麗泰噚日請老董同埋成班官員食晏，啲官就好畀面，好似忙緊西九龍嘅煲呔、成日想掠水嘅唐唐等人都賞面參加，但係做東嘅立法會得番一半人肯去應酬老董，班泛民主派當中除咗大狀黨同埋啲新丁畀面，其他人都當佢冇到，照舊開自己嘅飯盒會。
漁農界嘅黃容根，就叫多幾碟土產石岐雞請老董食。其實呢啲飯局傾埋啲嘢，又無聊又言不及義，去嚟都嘥時間。好似人稱「福建蔡菜子」嘅蔡素玉話，同佢同枱嘅「黃中指」黃宜弘一路食飯一路講鹹濕嘢，蔡菜子初時都嫌黃中指三級，唔想再複述一次，班記者問多兩句，蔡菜子先至肯大義滅親，供出黃中指講乜咁鹹濕！
同黃中指一枱重有唐唐、嫻姐、肥仔明、劉秀成。蔡菜子話，成枱人當時喺度介紹自己嘅心頭好，唐唐大讚唔知幾多年嘅喇fit紅酒，黃中指就大讚茅台，話茅台酒係好好嘅壯陽補藥，佢飲咗好多茅台，效果好到痹！至於效果有幾好？蔡菜子就冇透露啦。可能好似何偉途嘅口供咁，就算蔡菜子肯講，睇怕都要下刪一百字唔寫得！怪唔之得黃中指隻中指可以舉得咁堅挺啦。
不過劉秀成就幫住黃中指，話佢無講壯陽，佢淨係話飲茅台好，因為飲完唔會上腦，係蔡菜子聽錯晒。蔡菜子雖然唔多似識得壯陽之道，但當年小伏七月產子，話晒蔡菜子都夠膽出嚟片梁錦松唔讀性教育，各位梗係要信佢阿姐講啦！
其實，最需要「重振雄風」嘅係民主黨，佢哋只係派肥仔明一個做代表同老董食飯。民主黨今年十二月十二日喺黃大仙新光酒樓舉行晚宴，慶祝白鴿黨成立十周年，嗰日重會舉行黨大會，選出新一任黨主席，雖然馬丁好想有人同李永達片過，但過咁耐先至得個好似當年「李福善」咁嘅陳竟明，肯出來同達仔陪跑。達仔形容民主黨目前處於低潮，睇怕達仔上任後，真係要跟黃中指飲多兩杯茅台，幫民主黨「壯壯陽」！
傳真︰2623-9278
電郵︰