港股午後傳出中國快將加息，市場亦憂慮美國下月會加息，打窒港股早段的升勢，恒指倒跌31點，收報13895元，成交190億元。
濠賭股續個別發展，漢基（412）跌24%，新晉濠賭概念股駿雷（070）則勁升66.67%，收報0.03元，成交高達4072萬元。有老行尊話，但凡細價股出現炒風，證監例必過問股份交易，除非真係捉到有人違規造市，又或者出現莊家炒爆孖展，否則濠賭股冇咁易玩完，因為班炒家餓咗好耐至搵到個咁有吸引力嘅炒作藉口，點會咁輕易放過呢？
噚日停牌的永安旅遊（1189）配股抽水，傳配售60億股，每股2.8仙，集資1.68億元收購澳門金域酒店項目。據聞大部份貨源落入炒家及芬佬手，街外客可以攞到貨為數不多。
鋼鐵股噚日又升到鏗鏗聲，原來有消息話日本缺鋼，搞到日產要減產，而日本大同特殊鋼亦停止供應鋼材畀廣州本田及豐田，令佢哋要轉向寶鋼買鋼。消息刺激馬鋼（323）勁升11.4%，重鋼（1053）升7%，鞍鋼（347）升6%。換言之，依靠鋼材作為生產原材料的汽車業，正面對成本上升與銷售下降的雙重打擊。不過，駿威（203）噚日只跌0.86%，成交5742萬元，尚未見太大沽壓。
百利大（495）噚日復牌後急升21.8%，公司話山頂道物業估值高達20億元，並開始預售。若百利大能以估值價悉售物業套現20億元，在還清13.18億元債項後，應該重有6.82億元現金，相當於每股1.29元，較股價0.67元高出41.5%，意味重有好大上升空間。
阿虎