隔晚美國因為感恩節冇市，港股自由行。下周一期指結算後，料見真章。輪價波幅好大，有輪在手者忽然輸錢，忽然贏錢。前日標題推介隻中鋁C輪2167，成為第2大成交金額窩輪，前日最低散到38.5仙，昨日最高51仙，埋單價49.5仙，單日升幅24%，只係喺中鋁（2600）升15仙嘅情況下出現。
炒輪贏與輸，可能眼光因素佔4成，運氣佔夠6成。
恒指C輪：恒指大反覆，藝高人膽大兼夾輸得起嘅，可以喺升市時揸恒指P輪，博個市回頭。穩陣啲嘅則賭單邊，喺個市跌一二百點之時，喺低位買恒指C輪。
恒指C輪熱門貨係4539同4478，但講到各項條件，4442與4444靚得多，但呢兩隻C輪，近排成交縮晒。注碼細嘅，都係揀4442或4444化算得多。4隻輪都係明年3月到期。
太AC輪：太A（019）近排喺芬佬力「拜」之下，走勢有型，吼回吐買C輪，對象係4506，明年3月夠鐘，輪價81仙，溢價2.5%，槓桿率7.8倍（有效6.1倍），引伸波幅28.3%。
章盛