中美較勁，禍及好友。港股昨日早市走勢唔錯，正當大家預期好友重奪萬四關之際，恒指午市甫開即急挫，低見13856，較早市高位14009回落153點，就算以中午收市價計，亦跌逾百點。
原來有報道指人行顧問余永定透露中國正減少外滙儲備中的美元資產，持有美國國債的比例下降。美元即時有反應之餘，股市亦受壓，其後當事人雖作否認，但只能令港股跌幅略為收窄，恒指收13895，跌31點。
美國一直迫中國將人民幣升值，呢位中國學者喺呢個時候「講錯嘢」，內裏或有玄機。事實上，如果美元跌勢不止，要聯儲局出手大幅加息救美元時，對股市肯定有影響，到時淡友會有大條理由出擊。不過，趙飛雲短炒為主，港股走勢未出現轉勢訊號前，仍不會改變現時向好的睇法。
恒指全周升107點，升幅0.77%。周線圖技術偏好，平均線形成升市排列，周線9RSI雖升至77的高位，但未有背馳現象。
由月線圖看，好友今個月更是大豐收，恒指截至昨日為止累升840點，升幅6.43%，若確認升穿14000關口，12月可見14700。
倉內恒指Call輪4478，昨日走勢相當波動，最後收0.193元，跌2%。由於趙飛雲仍睇好後市，加上周四已沽一半貨減磅，而收市亦能守於0.191元計數位之上，所以繼續持有，睇埋下周一期指結算戰況。
百利保（617）周二急升後，連續3日以旗形整固，昨收0.216元，升0.93%，按原定部署以0.213元作計數位持有。
趙飛雲