名填詞人黃霑本周三凌晨病逝，其生前好友顧嘉煇昨日表示已接獲黃霑前妻華娃通知，指黃霑的喪禮暫定下月六、七日舉行。至於原定明年二月舉行的《煇黃演唱會》，現有意改為紀念黃霑的演唱會。
名填詞家黃霑本周三凌晨於沙田仁安醫院病逝，終年六十四歲。與黃霑合作三十餘年的好拍檔兼好朋友顧嘉煇，目前正在加拿大溫哥華寫歌紀念亡友，稍後會交由鄭國江、潘源良和林夕三人填詞，歌曲會由溫拿樂隊演繹。
記者昨日致電顧嘉煇時，他直言近日來為曲譜的旋律而頭痛不已。顧嘉煇說：「原本我想作哀傷啲，但有啲朋友就話黃霑性格開朗，首曲應該開心愉快比較啱啲，𠵱家都唔知點好，真係傷腦筋。」問煇哥可知霑叔的舉殯日期時，他表示已接獲霑叔前妻華娃的通知，煇哥說：「華娃打咗電話畀我，話應該過埋頭七之後，大概下個月六、七號左右。」問煇哥屆時可會致悼詞？他說：「我一向不擅詞令，所以唔會致悼詞，但應該會為佢扶靈。」據悉霑叔的家人暫定於六日為他設靈，七日舉殯，現時他們正商量喪禮事宜及以哪種形式舉辦喪禮。
至於原定明年二月在紅館舉行的《煇黃演唱會》，霑叔病逝後，煇哥已表示沒有心情再開演唱會，不過，主辦單位恆藝亞洲負責人丘亞葵昨日表示，有意將原來的檔期用來舉行一個紀念霑叔的演唱會。
丘亞葵說：「霑叔一向喜歡提攜後輩，尤其是音樂創作方面，所以我哋希望將《煇黃演唱會》換另一種形式舉行，例如係紀念霑叔嘅演唱會咁，將部份收益撥捐演藝學院等音樂學院，培育音樂創作生力軍。但當然我哋要徵求煇哥嘅意思，睇吓佢意願係點。」
另一方面，雖然黃霑是天主教徒，但與他相識二十多年的鄺美雲昨晚到紅館出席星雲大師的佛學講座，表示已私下請星雲大師為黃霑寫橫幅，一盡對好友的心意，她說：「佢會寫『上生佛國』，我唔認識霑叔家人，或者二十九日左右會將橫幅交畀蕭潮順（黃霑生前生意夥伴）。」鄺美雲又表示下月三日會到台灣高雄出席佛光山水陸法會，並已將黃霑的名字交給大會，屆時將有逾萬人為他們誦經。
而現時正在印度參與宣明會活動的張艾嘉，昨日接受港台電話訪問時說：「我收到一位好朋友嘅message，話霑叔走咗，其實我哋一路都唔知佢有cancer。十年前我哋好close，每個星期都見，因為大家一樣都癲癲哋，嗰時年輕，亦都好鍾意我哋做緊嘅嘢，好鍾意music、電影，但呢幾年各自有嘢做，就少見咗。」
張艾嘉又表示年輕時曾與黃霑和羅大佑合組公司，她說：「我哋搞過一個唱片label叫『果實』，嗰陣時同羅大佑、黃霑、邱復生搞咗間公司，出咗羅大佑第一張唱片，兩年之後發覺所有嘢喺台灣做，霑叔覺得自己唔喺度幫手，就話不如佢唔做啦，不過佢一路都好support。」
問張艾嘉可曾勸過霑叔戒煙？她說：「冇呀，因為嗰時自己都食煙。我覺得黃霑嘅一生冇乜遺憾，佢過咗好精采嘅一生，佢留低咁多好歌畀我哋，留畀朋友咁多好嘅回憶，係一個好精采嘅人。」而張艾嘉更表示最喜愛黃霑找她主唱的《世界真細小小小》一曲。
採訪、攝影：戴彩煥、張俊銘
