吳鎮宇與劉青雲前晚出席活動，獲贈兩萬元晶鑽，他們均表示會轉送愛妻，不過這兩位大男人平時就不太懂買鑽石冧老婆，鎮宇表示曾經在橕枱腳期間靜雞雞走去買鑽石𠱁老婆，但因碌卡需時，終被踢爆。
吳鎮宇和劉青雲前晚於中環出席《當ARTE遇上喜馬拉亞星》活動，二人獲贊助商送贈價值二萬元的晶鑽髮飾，為配合新戲《喜馬拉亞星》宣傳，晶鑽也取名為喜馬拉亞星，兩人都謂會將晶鑽轉贈愛妻。
青雲與鎮宇同是有家室之人，不過就不大會買鑽石冧老婆，青雲說：「結婚嗰陣咪送咗鑽石畀佢囉，要買佢自己會買，我買嘅話，老婆會猛問我幾錢，有冇折扣之類㗎，我呢啲小戶，我都想有能力送十卡八卡鑽石畀老婆呀。」
鎮宇則透露他試過偷偷送鑽石給老婆，可惜終被老婆發現而沒有驚喜，他說：「一次我諗住食食吓飯走去買鑽石冧老婆，等佢驚喜吓，點知碌卡十幾萬，卡中心查好多嘢，搞咗半個鐘，我老婆要去間舖頭搵番我，乜驚喜都冇晒，下次記得早一日打定電話去卡中心先得。」
同於印度拍戲返港的鎮宇和青雲，均表示該戲演員都有水土不服，鎮宇說：「喺印度有兩種，一種係屙到飛起，一種係冇得屙，我自己帶咗中藥去食，都ＯＫ，最多只係收工去飲兩杯啤酒，乜地方都冇得去。」
青雲則謂他最辛苦是要上喜瑪拉雅山拍攝，雖然全組人都吃了預防藥，沒有高山症出現，但舟車勞頓相當辛苦，青雲說：「我哋要搭三個幾鐘頭車上去一萬四千公呎嘅地方，由一個地方去另一個地方都要十幾個鐘車程，不過嗰度啲空氣真係唔同啲。」
提到黃霑病逝，青雲說：「我聽到都有啲唔開心，人生就係咁。」鎮宇則謂：「我知道後成個人痹一痹，我同佢冇話熟唔熟，香港冇人唔識佢。」
採訪、攝影：卓美娟
