韓國師奶殺手裴勇俊前日飛咗去日本為佢本最新寫真集宣傳兼造勢，吸引咗四千幾個日本師奶湧到機場接機，場面哄動。但係噚日就發生咗一件唔多開心嘅事，有十個喺酒店苦等俊哥嘅日本師奶仆倒受傷，令到俊哥心情相當沉重。
據知俊哥入住佢上次訪日時住過嘅東京NewOtani酒店十四樓全層，有唔少fans知道消息後即刻湧到酒店，喺噚日就有過千fans聚集喺酒店前門等候俊哥。直至中午，俊哥預備離開酒店，到六本木山為新寫真集舉行記者招待會，俊哥本來喺酒店後門秘密離開，但佢一時搞錯咗，突然喺前門出現，fans見到偶像即時蜂擁而上，包圍佢所坐嗰架BMW。因為場面混亂，唔少fans好似骨牌咁跌低，有十位師奶fans不幸受傷。
其後，身穿紅色絲絨西裝兼打紅色領呔嘅俊哥出席寫真集嘅記招，當佢得知有fans受傷後非常憂心。就算現場記者影相時，要求俊哥展露佢平日嘅招牌微笑，但俊哥都笑唔出，重為今次嘅事故鞠躬道歉，之後重眼泛淚光。據知原定稍後舉行嘅寫真展剪綵活動都會因而取消，而俊哥嘅事務所就表示會負擔十位fans嘅醫療費。