自從老董開聲叫各司局長多啲蒲頭曝光之後，果然班大哥大姐日日搞吓新意思，好似何志平咁，由下個月六號起，逢星期一晚上十點到十二點，會上港台嘅《夜心曲》開咪，重會開個《Sing聲相識》嘅環節，同啲市民傾吓偈，幫佢哋減壓。
而律政司司長梁愛詩噚日更選擇去問題多多嘅屯門探訪，話因為嗰區有大量新移民，又係家庭暴力事件嘅高危區喎。詩姐姐首先去咗屯門醫院聽簡報見吓人，跟住去區內婦女會湖景社區中心參觀培訓，又同地區領袖及代表會面。
另一位問責高官李少光就喺北京不停拜會，噚日見最高人民法院院長蕭揚嘅時候，就當面多謝佢協助跟進涉及港人嘅案件。
（圖）蕭揚（右）早前來港，有人向佢攔途請願，李少光特意多謝佢答應跟進。
傳真︰2623-9278
電郵︰