中國（香港）石油（135）由近期高位1.39元回落到1.25元水平，又係低吸機會。
今年9月中曾作推介，當時股價1.15元，以高位1.39元計，升幅有20%，現在上車，中線目標價1.70元，預期升幅仍可觀。
中油主要業務為勘探及生產原油，近日與大慶石油管理局成立合營公司，後者主要係提供石油工程技術服務及生產石油化工產品，包括CPP產品。
大慶石油管理局由中油母公司CNPC直接全資擁有，合營公司註冊資本1200萬美元，中油及大慶分佔25%及75%股權，主要從事產銷及研發CPP產品及相關原材料，目標係達至年產量1.4萬噸。中油認為CPP產品需求短期內會持續上升，可為公司提供穩定收入。
近期油價由高位回落，但在46美元已企穩，市場預期在未來的一段長時間，油價仍會企於較高水平。
以中油現時每年產量1200萬桶計算，油價每上升1美元，集團淨利潤便可增加7000萬元；若今年平均油價比去年上升6美元（亦只係30美元），中油盈利已可增加超過4億元。
04年度（12月年結）的上半年，中油獲利4.32億元，升38%，每股盈利9.11仙，保守估計全年盈利11億元，每股盈利22仙，以目標價1.70元計，PE亦只係8倍。
半個月前，推介過中信資源（1205），當時股價1.49元，兩日內飆升上1.92元，但又大幅回落到1.50元水平，股價急升係春江鴨入市，而急跌亦有古仔，就係有關方面傾緊單大「刁」，股價若升得太急，會好礙眼，所以要㩒番低佢。不過，落到1.50元水平，又係上車機會，相信唔使一兩個月，股價會上番高位。
噚日收到料，話中信資源單大「刁」已傾到八八九九，好大機會喺下月中之前落實，到時股價就會有另一番新表現。家吓中國有3個石油經營牌照，經營者分別係中石油（857）、中石化（386）同中海油（883），中信資源會攞到第4個牌，亦係最後一個，而且會同外國石油企業合作，中信資源在呢方面嘅發展，絕對可以寄予厚望。
郭兆誠