內地球星高峰之前死唔肯認舊愛王納文生嘅私生子元元，卒之王納文要入稟法院，驗DNA證實元元係高峰個仔。王納文日前接受內地記者訪問，重大爆自己同高峰拍拖生仔嘅情史。
王納文話高峰係佢喺瀋陽開嘅酒吧嘅客人，當時高峰同那英分開咗，佢兩個就走埋一齊，冇話邊個追邊個，之後重同居。
王納文又話高峰係管唔住嘅男人，佢成日唔返屋企，連分手都冇講清楚就唔見咗人，佢重話高峰飲醉時曾話過最鍾意佢唔黐身。王納文最後一次見高峰係○○年十一月，當時佢有咗四個月，高峰因為有隊友結婚而去咗瀋陽，順便打電話畀王納文話要見佢，高峰見到王納文大肚，即時嚇咗一跳，但同佢講話如果真係想生就生啦。
王納文話佢告高峰係迫於無奈，佢畀咗三次機會高峰，高峰都唔肯見佢，試問邊個女人可以接受老竇唔認仔？高峰諗過每個月畀二百蚊打發佢，佢就叫高峰慳啲。王納文重話本來想放過佢，但高峰公開話懷疑個仔唔係佢嘅，即係侮辱佢兩母子，所以佢先要討回公道。
名電視監製蕭笙因肝硬化入住廣州醫院，日前因病情惡化由家人安排返港，於將軍澳醫院治理。據監製蕭顯輝透露蕭笙叔已要駁喉入肺幫助呼吸，佢話：「佢𠵱家膚色好過喺廣州時，之前我喺廣州探佢，佢重講笑，好樂觀㗎。」噚日除咗蕭顯輝外，蕭笙個仔同新抱都有去探佢。
伍詠薇噚日喺尖沙嘴幫一間美容公司拍廣告，講起做SPA，伍姑娘話做SPA唔單止減壓舒服，重可以瘦身。不過佢試過同老公去泰國做SPA，因為唔夠女服務員，卒之要由兩個男人幫佢做，點知嗰兩個男人整跌咗佢條毛巾，搞到俾人睇全相，伍姑娘話：「好尷尬呀，但最遺憾係嗰兩個男人望住我都冇反應！」
何韻詩、黃家強同at17噚日出席喺商台舉行嘅活動，阿詩最近發現自己有脫髮危機，佢話：「因為最近係咁駁髮，駁咗成三個月，所以每次駁嘅時候都好似甩咗唔少頭髮咁。」
有報道話周杰倫搶咗歌神許冠傑（Sam）出年一月喺澳門嘅演唱會檔期，阿Sam演唱會出品人丘亞葵噚日好唔滿意咁話：「我去澳門睇過景，發現原來地方實在唔夠用，加上一月近海會好大風，所以澳門方面就建議改期同改地點，我覺得成件事係有人借阿Sam嚟幫周杰倫造勢囉！」
