前晚歐冠盃，睇賠率最多人捧場嘅都算係俄羅斯球隊莫斯科中央陸軍，單Ｗ由隔晚一點八五倍落到臨場近一點六倍，但最後贏唔到之餘連一分都攞唔到，自己出線形勢危急兼累埋捧場客，都算「害人害己」！
唔少球迷都知道俄羅斯足球近年獲財團注資，幾支球隊都有大搞作，中央陸軍係其中一隊；加上周二晚睇到烏克蘭基輔戴拿模喺冰天雪地下贏羅馬兩粒，多數球迷都諗住呢場中央陸軍可以恰到波圖。點知重演上輪主場輸畀車路士戰果，又係以○比一敗北。
更相似嘅係，呢場中央陸軍同樣有個十二碼機會扳平，點知上次路夫射失，今次換上恩拿舒域治主射亦宴客。累人輸錢兼失去出線優勢，你話怪邊個好呢？
季初表現一度令人眼前一亮嘅爵士，最近唔知食錯乜嘢，繼上場喺主場爆大冷輸畀開季八場全敗嘅黃蜂後，噚日竟然又喺主場爆大冷輸畀九戰全敗嘅公牛。爵士向來喺主場出名表現穩定，呢兩場波定累唔少捧場客焦頭爛額。波友今後見到爵士主場再對魚腩時，千祈要審慎落注喇！
禮拜二皇馬對利華古遜場波有下文。據報電視重播顯示皇馬球迷做出納粹敬禮動作，球迷又用帶有種族歧視語句鬧洛基祖利亞同祖安。皇馬賽後就話無聽聞球迷作出呢啲行為，好衰唔衰奧雲就認聽到。奧雲衰老實，皇馬有可能被罰主場閉門作賽，如果係佢就實俾球會詐型囉。
意大利球隊今年喺歐冠盃好鬼醒神，呢輪賽事好似連意大利嘅球員都大發神威咁款。好似西班牙冠軍華倫西亞，隊中兩位前鋒迪華奧及哥拉迪前晚就各入一粒，幫球隊作客贏安德烈治二比一。如果華倫呢個勢得以延續，最後嗰輪贏埋不來梅出線的話，到時重威！
深圳健力寶日前攞咗球會首個中超聯冠軍，但係受球會欠薪事件影響，就算奪標都只喺響下個月開個大型晚會祝捷。又難怪，球員上季合共二百五十萬人民幣獎金，要到前日先收到，重有今季成七個月嘅球員薪水，到𠵱家仍然唔知幾時先會到手；出糧問題未搞掂，邊有心情慶祝。