西九龍文娛藝術區公眾諮詢尚未展開，民間嘅聲音唔係咁多，市民重係談論緊究竟房委會分拆嘅領匯基金抵唔抵買。不過，藝術細胞已經上晒身嘅入圍財團，公關推廣活動一浪接一浪。好似由長實同新地合組嘅活力星，帶傳媒十天睇盡五個國家博物館嘅「考察團」，今個星期日就出發。唔知係唔係照顧埋一班冇得去考察嘅記者，新地郭氏基金贊助國家級中央芭蕾舞團來港表演，禮拜日重特登請記者去文化中心，欣賞舞團演出《巴蘭欽晚會》。講開呢個舞團，一九五九年成立，到過全球三十多個國家同地區表演，認真唔簡單。
而無緣參與西九龍文娛藝術區計劃嘅太古集團，主席何禮泰噚日出席總商會活動後話，社會需要更長時間討論西九計劃，個項目咁重要，政府毋須急於上馬。佢話文化活動應該喺市中心舉行，等市民容易參與。
（圖）雖然再冇份玩，但太古主席何禮泰重好關心西九嘅發展。
傳真︰2623-9278
電郵︰