台灣金馬獎頒獎禮喺下個禮拜六舉行，王家衞執導嘅電影《2046》雖然有八項提名，但王家衞就冇份角逐「最佳導演」獎，有報道話因為王家衞落馬，《2046》演員包括有份角逐影帝同影后嘅梁朝偉同章子怡、型男木村拓哉等，全部都唔去頒獎禮，馮仁昭唔知王大導係咪真係因為咁，所以連其他演員都唔可以出席，如果真嘅話，似乎少咗份風度。
其實早前評審之一嘅許鞍華解釋過王家衞入唔到圍，主要係班評審覺得佢拍呢部戲嘅成績，突破唔到之前嘅作品，睇戲係好見仁見智嘅，啲評審有咁嘅睇法都冇辦法，但外界冇人唔認同王家衞嘅出色成就喎！馮仁昭就覺得參與一個遊戲，應該遵守遊戲規則，要有體育精神㗎！
陳冠希（Edison）噚日接受商台訪問，透露最近同朋友合作搞畫展，而佢嘅新碟就快推出，今次佢搵咗唔少朋友幫手，包括緋聞女友Stephy，問Edison唔怕再傳緋聞？佢話：「因為我隻歌要一個好cute嘅女仔聲，Stephy把聲又好啱，我都預咗俾人講，兩個人一齊做嘢，唔代表係情侶。」
名模蔣怡噚日去深灣珍寶王國，出席一頒獎典禮。提到剛過身嘅黃霑，蔣怡話同霑叔喺電影《我的大嚿父母》中演父女，蔣怡之後主持亞視節目《蔣怡新煮意》亦搵過霑叔做嘉賓，蔣怡話：「佢真係好有才華，嗰個節目原本係一集過，但佢講得太精采，所以個節目先改為兩集播出。」
劉燁同內地演員袁泉有份主演嘅音樂劇《琥珀》噚日喺中環舉行記者會，劉燁透露最近同奧斯卡金像影后梅麗史翠普（MerylStreep）合作新戲《流星》，佢話：「我們只拍了一點點沒對白的戲，之前在北京我們有去過飲茶，她很好，一點架子也沒有。」
港台喺明年一月十九號會喺紅館舉行《十大中文金曲頒獎典禮》，港台高層李再唐同周國豐噚日喺尖沙嘴見記者，佢哋透露當晚會由陳百祥同方力申擔任嘉賓司儀，因為覺得方力申形象好同口齒伶俐，不過周國豐就講明方力申雖然有份角逐獎項，但做司儀並唔代表佢有着數。
