個市調整，恒指高低波幅187點，埋單唔見70點。下周一期指結算，有人鬥法難免，上月底至今恒指最高升1037點，昨日收市計升872點，唔升得太盡，留番啲下個月升都啱數。
中石油C輪：石油股好穩定，中石油（857）同中石化（386）都有1格進帳，中海油（883）則只微跌1格。油股未必跟足油價上落，油價亦未必即時大散，油輪搵一兩件短炒可也。
中石油C輪2144數據好靚，收27仙，冇跟正股升，反而下挫10%。隻輪明年1月初到期，溢價冇晒，負0.1%，槓桿率16.2倍（有效10.7倍），引伸波幅不適用。其次2242，昨日企定喺44仙，明年3月到期，溢價1%，槓桿率9.9倍（有效8.3倍），引伸波幅19.1%。
東亞C輪：東亞（023）收24.40元，升25仙。咁啱高盛出報告推介，調高明年盈利預測，目標價28元。東亞C輪有限，比較睇得上眼嘅係9054，明年3月到期，溢價3.3%，槓桿率18.5倍。同滙控（005）好多C輪比較，東亞C輪數據唔見得吸引，但短炒，細細注，倒無傷大雅。東亞另有隻C輪4693，交投都唔錯，明年9月到期，輪價26仙，溢價13.1%，槓桿率9.4倍（有效4.7倍），引伸波幅35.5%，呢件溢價咁高，買唔過。
和黃C輪：和黃（013）收65.75元，跌75仙，先一排升得急，調整吓好應該，如果再跌多幾格，可以諗吓短炒C輪博反彈，對象係2157，明年1月到期，輪價1元，溢價0.4%，槓桿率6.6倍（有效6.1倍），引伸波幅30.4%。
章盛