來得快時去得快，澳門賭業概念股話升就升，但亦係話跌就跌。噚日有幾隻澳門賭業概念股跌至打回原形咁滯，好似瑞力控股（491）急跌44％，收1.9仙，漢基控股（412）跌33％，收4.5仙。
但最肉酸都莫過於永安旅遊（1189），公布落實收購澳門酒店後復牌，高開升至5.8仙後，就竟然一直派貨，結果成隻股散晒，收市倒跌28.21％，收2.8仙，成交股數高達92.5億股，金額3.63億元，睇落真係恐怖到不得了。經紀陳話，噚日市場屍橫遍野，跟炒即日鮮之徒，特別傷得重。其實買得呢類股份，就要預咗有今日，唔通幕後炒家會同散戶講道義咩？
由於有唔少散戶同炒家重傷，睇嚟細價股短期都係冇運行，小初還原基本步，搵返啲有基本因素，有大行推介的股票嚟玩，其中冠捷科技（903）即將在本月底公布第三季業績，據講有人估計盈利增長不俗。
早排冠捷股價一度急跌至4元樓下，但最近就反彈唔少，公司話有收購傾緊。冠捷噚日升4.14％，收4.40元。
慕容小初