當樓市處於升軌，喺市區靚地段收購舊樓重建，可以話十拿九穩有錢賺，但係過程唔一定順利，好似收舊樓老手恒基地產，據聞多年前收購西半山輝煌豪園個地盤，收到最後個地窖單位，遇上極大阻滯，搞極個業主都唔肯遷出，恒基不惜賣大包，答應重建後，將兩個住宅單位作為賠償，業主就無端端發達，恨死以前嘅所有舊鄰居。
其他發展商好似南豐，都試過喺半山收舊樓碰壁，話說一個單位業主移咗民兼年紀老邁，將單位免費畀人住，不受任何租務條例約束，南豐冇權趕走個住客，但係又無法聯絡業主，個重建計劃惟有拖到今時今日，睇嚟可能要同個特殊住客鬥長命。
所以話，發展商唔一定可以靠現時法例，無往而不利咁收舊樓重建，個別發展商更一直都唔熱衷呢門生意。
聖誕節係黃金檔期，商場例牌粉飾一番，好似信和置業咁，就動用一千萬，布置旗下九個商場，連宣傳費共二千萬，比起舊年多一成。今年就以音樂做主題，不同商場擺放不同樂器裝飾，比起傳統用聖誕老人同鹿車為主題，更有新意。
其中奧海城用豎琴做主題，周圍掛滿金色小豎琴，重搭建多一座古希臘神殿，以及擺放巨型女神像，定時定候轉動，並且播出音樂，增添開心氣氛。
佢哋噚日開記招，更找嚟俄羅斯豎琴家及舞蹈家，演奏跳舞助興，令蘭西都沾染到藝術氣息。
地產代理反應一向要快，更加要掌握唔同市場資訊，噚日中記成為全港第一間代理，送迪士尼大禮，下個月十二號之前，其中三個樂悠居買家，可以獲贈迪士尼樂園入場券，每位四張。
香港迪士尼要到明年九月十二至開幕，有排都未到，都可以預早送門券，變通反應真係快得緊要，但係得咗獎嘅買家，都重要等超過大半年先有得玩。
蘭西知道，各大代理搞呢類推廣活動，時有競爭，對手如果想後發先至，或者可以諗諗，送吓世界各地迪士尼門券、機票等等，相信吸引力更大。
西九龍文娛藝術區成為近期城中熱話，同樣喺西九龍區嘅長沙灣宇晴軒，樓盤嘅發展商組合，又咁啱同入選競投文娛區發展嘅活力星拍檔一樣，即係新地加長實。
為推動藝術發展，發展商同香港中樂團合作，今個周末買宇晴軒者，可以獲贈下個月舉行，中樂團同藝人汪明荃舉行嘅慈善籌款演出門券。
發展商話，日後宇晴軒會所將設有耗資二百萬興建嘅中樂賞樂坊，挑選唔同中樂器，畀住戶租用。會所與中樂團會舉辦中樂樂器訓練課程，住戶同時享有中樂團節目門票折扣優惠。
香港樓市旺嗰陣，地產代理豬籠入水，隨時搵快錢，成為好多大學生夢寐以求嘅職業。估唔到呢個現象，𠵱家飄到去樓市正起飛嘅澳門。美聯澳門分行最近就請咗位讀醫出身、喺澳門衞生局做嘢嘅年輕人做代理。
呢位仁兄名叫孫家宏，喺廣州讀完醫科，入咗衞生局做咗一年。佢睇好澳門地產，認為應該趁年輕去搏殺一番，唔想做死份政府工，所以決定辭咗份過萬蚊月薪嘅工，轉做地產代理。做咗一個月都未夠，𠵱家收入暫時唔及政府工好，但有信心將來一定會有出色，而且屋企人都好支持佢喎。
商場拆售潮仍然繼續，市場消息話，受旺角朗豪坊開幕刺激，金龍集團或有關人士，所持有嘅旺角銀城廣場地庫，約一萬呎，將於下個月初，分間成大約七十個細舖。初步意向價，每呎超過兩萬大元。呢個價，喺朗豪坊未落成前，差唔多係區內個別地舖嘅價錢，但係朗豪坊效應，令人流上升，租值可再看高一線。除咗地庫之外，業主亦持有地下至三樓，不過，初步只會拆售地庫部份。
投資者紀寶，現時拆售緊嘅尖沙嘴重慶大廈二樓重慶站，呎價大約萬七至兩萬二蚊。
電郵地址：
