濠賭股掉頭急挫，市場氣氛轉壞，連帶好多二三線股都受拖累。不過，收市後做咗一個小小嘅調查，暫時看調整嘅人仍佔大多數，即係「唔使怕」，未來上升嘅機會仍大。事實上，𠵱家吓資金嘅流向看，冇理由唔睇好。
濠賭股炒到「㷫烚烚」，已經唔正常，唔回一回，就更加唔正常。至於炒完未，好難講，有可能唞完氣又再衝過。馬局長噚日潑冷水，叫證監昅實賭股嘅炒風，令賭股當堂「謝」咗。另外，又有一個消息，就係經紀行會收緊賭股嘅「孖展」，一毫子都唔借，唔少人收到風，紛紛減磅，拋風一起，愈吹愈急，有等跌幅更超過4成。
遠東發展（035）噚日再跌，震倉唔會只震1日，但落到3元樓下，又係上車機會。聽聞有間大行係做11月結，而佢手上揸咗唔少遠展，呢鋪真係賺到笑，所以呢輪在市場沽咗唔少，一來計賺錢數，二來㩒番低個價，等帳面唔好賺咁多，亦都可以留番更多水位畀下年度走盞。
蜂林（8156）噚日逆市而升，收0.90元，升1仙，聽聞除咗有兩個Fund（其中一個係中糧集團）各自揸咗超過5%股權外，重有兩個大Fund準備入股，講緊嘅數目係20%。蜂林如果再做埋呢兩單deal，就會變身成為基金股，評價自然亦會提高。
家吓持有5.4%蜂林嘅OppenheimerFunds，有成40年歷史，過去嘅投資增值大多以倍數計，今次入股蜂林，係睇中佢嘅發展前景，而且重有意在市場增持。
蜂林核心業務係製造同分銷蜜蜂相關產品，包括蜜蜂花粉、蜂皇漿、蜂蜜和飲品等。過去1年，透過擴闊產品組合同分銷網絡，盈利大增。現年度（05年6月年結）的第一季，營業額6300萬元，獲利1206萬元，上升60%，每股盈利2.51仙，保守估計全年盈利7000萬元，每股盈利14.5仙，以PE8倍計，股價已可升近1.20元水平。
蜂林持有湖南阿波羅零售企業20%權益，已計劃在明年初上市，初步估計發售25%新股，可套現5億元；另外，蜂林收購的問博控股（8212），近期股價由0.1元升到0.25元，帳面增值以倍計。
郭兆誠