本欄十一月十八日講《批命隨口噏》，講及一九七六年七月一日係農曆丙辰年乙未月甲寅日。稿件見報後，自己一睇，嗌聲弊，每個月嘅一號，未過節氣，用農曆計，月份仍屬上一個月，睇萬年曆要自己調整番。七六年七月仍係甲午月先至啱，寫稿之時太匆忙，唔記得咗㖭。
《蘋果》讀者乜嘢專才都有，果然立即收到讀者阿Mark電郵，指出錯誤，阿Mark話上網一仄就知道當日係丙辰年甲午月甲寅日先至啱啦。跟住命理專家麥玲玲又嚟電郵，指出左丁山唔係玄學專家，寫錯農曆月份。麥玲玲又話佢冇睇到《明報》關於雲尼斯特萊與古華特之報道，記憶之中，記者問佢之時，佢自己可能聽錯七六年係六七年又或者按掌上電腦㩒錯掣，而自己對足球唔熟悉，所以擺咗個烏龍喎。
呢勻左丁山真係擺烏龍，正是剃人頭者，人亦剃其頭，以後寫稿要加倍小心。多謝麥玲玲及阿Mark指正。讀者李女士來電郵問阿桂姐出咗流年運程書未，可唔可以講吓運程先？阿桂姐最近有大喜事，十一月八日請飲，下嫁如意郎君，過去一排，桂姐忙於籌備婚禮，𠵱家過緊蜜月溫馨期，左丁山點好意思去打攪佢。等桂姐坐定定開工之後，再向讀者報告啦。
讀者小馬問去邊度可以買到本沙田車公廟靈籤一書，佢周圍都搵唔到。左丁山前年碰運喺沙田第一城啞仔報紙檔買到一本，報紙檔現已停業，真係唔知去邊度買喎，對唔住，幫唔到你。讀者董先生問雲咸街煙斗店地址，查實該煙斗店已搬咗上樓，只做熟客，地址要問過先話畀你知。