流行曲大師黃霑仙遊，享年六十四歲，全港市民，均表痛惜。
黃霑係鬼才，不但將廣東粗口講到出神入化，好似唱大戲咁，重驚世駭俗，推行「不文化」，大講生殖器官有關嘅笑話，得風氣之先，領導華人世界三十年！
霑叔生前填詞二千幾首，首首佳作，話佢係鬼才，簡直係辱沒咗，佢係同莫扎特同一級嘅天才就真！尤其係佢六四之後，與全港市民心連心，聲討天安門法西斯式屠城，重義作歌詞，嘲諷中共「慈祥鵬」及「矮仔鄧」，喺嗰一刻，霑叔嘅藝術家良心聲譽，達到巔峯！
不過呢兩日好多讀者來電，喝住蘋果及八方，叫八方小心唔好將霑叔無限神化，佢哋話，霑叔後來唔知點解，轉向走去狂撐董葉劉23條立法，重發表公開信指反23條嘅市民係罔顧國家穩定，呢一樣，就真係令佢好多fan屎失望！
八方認為，呢件事要分兩層睇：首先老霑佢係一個音樂家，生前對流行曲藝術貢獻巨大，就算晚年思覺偶而有少少甩咗轆，都係功大於過啫！
第二，老霑佢出名欣賞靚女人！保安局局長葉劉，同霑叔一樣港大畢業，獨挑23條立法大任，叫名流支持。霑叔憐香惜玉，發揚俠客護花救美精神，若果換咗係第個臭男人，例如阿董出頭叫佢撐，霑叔佢未必肯咁瞓身啫係咪？
霑叔生前引述過大文豪蕭伯納講：世界上最污糟嘅兩樣嘢，就係政治同埋女人性器官，可惜呢兩樣嘢男人都鍾意搞，黃霑誓神劈願：佢寧願鍾意女人都唔鍾意政治。
講得啱吖！因為以霑叔赤子之心，又點明白政治嘅險惡！可惜佢晚年忘記咗蕭翁及自己嘅承諾，一個唔覺意，俾別有用心嘅邪惡勢力利用咗，估唔到就咁中咗招！
不過，唔怕！正如佢老人家講：人生唔可以咁完美，一定要有缺陷，有缺陷，先至有作歌嘅靈感！霑叔以身作則，畀咗後輩好多啟示，就係千祈唔好俾「愛國」呢樣政治呃咗，明明跳落火坑，重以為入咗迪士尼樂園！霑叔咁聰明都中招，何況凡人呢，若然23條立咗法，憑一首《慈祥鵬過聖誕》，分分鐘顛覆祖國，以後真係要打醒精神呀！
霑叔，你嘅遺教，我哋收到晒嘞！祝你去到一個冇23條嘅自由天國，開開心心咁繼續唱衰「慈祥鵬」喇！
傳真︰2623-9278
電郵︰