呢排手機界都幾悶，睇嚟睇去，都係睇吓邊部機最多像素，外形來來去去都離唔開摺、直、推、扭，真係冇乜驚喜。之不過日前網上流傳Nokia部新機就總算有啲驚喜，呢部傳聞為「Neo」嘅新機，就認真夠晒古怪。首先最古怪嘅就係Nokia竟然唔再用數字嚟做型號名，雖然出街時都可能會畀番個Number佢，不過睇番之前嘅「傳統」，就算流傳新機都會有個型號名，今次用個英文名，唔通Nokia覺得佢哋嘅型號已經多到記唔晒（事實上又真係幾多幾難記）？
之不過除咗個名之外，大家嘅注意力都去晒佢個轉盤上，若果記性唔差嘅，早前Nokia發表部7280都已經初試碲聲，用上旋轉式鍵盤，不過7280個轉盤只有個一蚊咁大，今次就一於玩大佢，等大家可以捽餐飽。
而Neo流傳緊嘅規格有208×208像素6萬5色芒、30萬像素鏡頭、SD/MMC插卡、MP3播放、內置7MB記憶體，未算頂級，不過以呢個咁破格嘅外形，已經唔使理佢好唔好睇，實唔實用，起碼你見到都一定會拎上手玩吓先，咁就已經收晒效果。
文：通訊人
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。