港股大升後表現轉趨反覆，噚日恒指一度衝上14091，但3時過後，就掉頭回落，結果低收13997，倒跌26點，成交仍好暢旺，同前日一樣，有262億元，期指則轉為高水。
大市噚日回軟，乃大升後嘅正常調整，從大行同基金買貨的盤路看，顯示仍陸續有新水流入市場，預計大市在14000水平略作整固後，可向高位推高，如無意外，今個月期指在14200至14300水平結算的機會甚大。
銀建（171）噚日午後曾一度震倉，壓到落去4.35元，但低位又見大戶連環槍掃番上去，結果收4.50元，升1個位，市場消息好勁，相信股價好快會見5字頭。
遠東發展（035）噚日嘅平均成交價係3.37元，但低收3.25元，主要係有人在尾市做手腳。睇番紀錄，在尾市3分鐘之內，股價由3.35元質到落3.20元，成交只有332.5萬股，係噚日成交2942萬股嘅11%。以遠展呢隻基金股而言，大戶臨尾質低，無非係想震倉，買平貨，呢種場面，在遠展喺2.0元水平時亦見過，當時亦震到有唔少人離場，錯失由2元急升上3.0元的千載一時機會。家吓大戶又重施故技，預期遠展日後嘅升幅都唔會細。
基金呢輪睇好航運股，亦都開始有所動作，太平洋航運（2343）係吸納對象之一。太航呢大半個月嘅走勢已形成大型上升三角形，家吓已破位而上，而MACD出現雙牛入貨訊號，照度上去，中線目標可見5字頭。
太航主要在亞太區經營乾散貨海運，年中時以海股2.50元，發售2.53億股上市。招股預測，04年（12月年結）全年盈利5.07億元，加權每股盈利0.47元。不過，上半年度盈利3.36億元（較前同期大增5.1倍），已佔全年盈利預測66%，相信全年盈利可比預期為多，預測PE不足7倍。
高盛證券報告指太航業務基調穩健，兼且運費上升亦令收益增加，故維持「跑贏大市」評級，目標係由3.50元調升到4.50元。以05年盈利計算，4.50元目標價即PE7.6倍，股息率6.6厘，重係好吸引。太航唔係炒股，但一年半載有逾30%利潤可圖，都應該揸得過。
郭兆誠