永泰亞洲為新盤火炭晉名峰，喺尖東新東海中心搭建嘅示範單位，氣派不凡，蘭西聽聞家住九肚山嘅玩具大王蔡志明，日前都慕名而來，想參觀示範單位，可惜發展商當日嘅預約已經滿額，惟有同蔡生另約日期。
蔡志明今次可謂近水流台，因為佢公司最近喺新東海中心地下，即晉名峰示範單位入口旁邊，租用咗個單位作為玩具展銷場，巡視業務之餘可以順便睇樓，不知幾方便。玩具大王近年掃入唔少豪宅，如九肚山寶松苑、大埔鹿茵山莊同埋紅磡海名軒等，相信發展商定必落力招呼。
講開名人，喺尖沙嘴返工嘅信和主席黃志祥，聞說都有預約睇晉名峰，但係唔知擇咗邊日，不過佢睇嚟為公多過為私，信和旗下嘅上水新盤御林皇府部署開售，同樣以氣派作賣點，實行同永泰切磋一番。
長實噚日個畢架山一號記者會，搞咗場職員跑步比賽，三個參賽者着上代表九龍站豪宅、沙田豪宅同埋九龍塘豪宅嘅T-shirt，鬥跑斜路，唔知有心定無意，沙田豪宅嘅代表，半路跌倒，最後由九龍塘豪宅代表勝出，有乜寓意？大家心照啦。
近年大家都睇好澳門嘅經濟同樓市，唔少內地同香港發展商，都已經過去探路，希望分一杯羹。香港代理都開始進軍當地市場，其中表現最積極嘅美聯物業，過去短短五個月間，喺澳門開咗五間分行，其中三間就係噚日一口氣開嘅。
美聯副主席張錦成話，每個舖投資大約一百萬，而且經營得唔錯，個個月有錢賺。𠵱家喺澳門嘅人手大約一百人，九成係當地人。佢哋諗住開始去做多啲大deal。美聯澳門部行政總裁張一輝講，美聯會喺氹仔個龍頭舖裏面成立培訓中心，同澳門同行合作搞培訓工作，提升大家嘅專業水準。
荃灣樂悠居賣咗幾百個單位，半數都係投資者接貨，不過班炒家似乎重未夠喉，噚日又有人掃貨。利嘉閣陳潤琪講，一名外地華僑，斥資一千五百萬買咗六個樂悠居單位，分布於高層九、十及十五室，平均呎價就要四千一百蚊。聽講買家打算將單位放租，預計回報有五厘。
有人爭住入貨，亦繼續有炒家快速出貨，代理話，噚日樂悠居又再有約六宗二手成交，其中一低層一室，買家以一百六十二萬買入，剛以一百七十八萬售出，賺近十六萬。
電郵地址：