護衞公司大隊長老P召集朋友吃飯，叫左丁山出席。十二人坐齊，一半人要左丁山講「領滙」，隻股票買唔買得過？有乜風險？息率係唔係高達六厘幾七厘？入紙申請有冇機會？嘿，大家都係睇報紙得到啲資料，你哋知咁多時我知咁多，做乜要左丁山講？原來眾人之中，老L三年前已經食咗房屋署肥雞餐，過緊退休生活，好緊張嗰筆肥雞費如何投資，更何況佢對房署管理開嘅物業有啲感情呢。老L係要左丁山講分析，咪吹牛一輪囉，好彩「領滙」唔係創業板上市股，吹牛唔會吹穿窿。
老L家居沙田火炭，火炭最近成為「大亨的國度」，老L與有榮焉，亦希望自己層舊樓受到連帶影響，可以升值，話晒係「九肚山畔」噃。老P問老L：「乜嘢叫做九肚山畔？」老L話：「查現代漢語詞典，畔即係江、湖、道路等的旁邊，如湖畔、橋畔。九肚山畔即係九肚山旁邊啦。」老P又問：「你層樓喺九肚山畔咩？」老L話：「距離都幾遠，九肚山與火炭有一山之隔，以山為中間界，我住響山之西，九肚山在山之北，咁樣火炭算唔算係『九肚山畔』呢？譬如九龍塘與沙田大圍相隔一個獅子山，過咗隧道就到，大圍又算唔算係『九龍塘畔』呢？」
廣告公司之寫手（Copywriter）嘅創意中文確實考起好多人，譬如一句「大亨之立國」，就莫名其妙。大亨立國！想作反咩？大亨從來都唔會搞革命立國嘅噃。又譬如「大亨另一個輝煌歲月，正式閃亮！終於，找到真正匹配自己的屬地。大亨的心，定了。」呢啲句子如果要搵李純恩修改，每隻字要收一千銀。香港最真正嘅大亨，全部住響淺水灣、深水灣、石澳、山頂一帶，住到去火炭，「中亨」都怕未係，中產就有好多，唔信，可以問吓劉兆佳。