原來除咗二三線股想藉沾手澳門賭業大翻身之外，大孖沙都一樣好此道，好似明明話投資電影娛樂的創博數碼（8118），收購外國電影公司單deal都未搞掂，又話向周大福收購菲律賓酒店連賭場，及獲注入澳門賭業項目。
創博噚日最高見過18元，收12元，勁升5.4倍，自從上次科網熱潮之後，好耐都未見過咁勁抽嘅升幅，但成交股數只得63.77萬股，金額798.8萬銀，咁細成交，擺明未有人跟風。
至於兩個星期內連續配股兩次的邁特科技（1031），雖然公司已經表示淨係洽商收購澳門酒店，唔沾手賭業，但股價繼續拾級而上。
經紀陳話，江湖傳聞邁特幕後背景強勁，搵到對沖基金入局，一副想食大茶飯格局，重話收購澳門酒店一事唔係玩玩吓，好似會在短期內成事。
邁特噚日在下午發力，最高見過0.27元，收0.26元，升咗13％，成交金額1.34億元，股價創近4年新高，之前兩次批股接貨嘅大戶，帳面已經賺大錢。
慕容小初