【本報訊】鬼才黃霑歌影視圈都有涉足，在電視方面，曾為無綫《香港小姐競選》擔任司儀、替《城市追擊》做主持，而令人印象最深刻的，莫過於與倪匡和蔡瀾為亞視主持清談式節目《今夜不設防》，當年更被封為「三名嘴」之一，三人雖然經常喝醉了做節目，但觀眾依然很受落。 記者：林妙萍、卓寶花
跟黃霑同有「香港四大才子」之稱的著名作家倪匡，昨在三藩市得知好友病逝，接受港台訪問時表示：「自己喺三藩市時間早上十點半左右收到蔡瀾電話，先知黃霑逝世，我真係發呆到𠵱家。豈有此理，冇道理㗎嘛，我大佢咁多重喺度，係都係我去先嘛，真係好唔開心，都唔想食嘢。」倪匡續稱：「我同黃霑周不時打電話聯絡，佢有乜嘢𤷪𤺧就打電話嚟發洩。老婆每次返香港第一時間會搵佢食飯，呢次返香港搵佢，佢就話唔好住，已經知道唔妥。個幾月前我有同佢聯絡，但係佢都唔主張將痛苦帶畀朋友，鍾意將快樂帶畀朋友。」
倪匡又大讚黃霑是他所認識中最真、最直和最忠的人：「咁直都撈到風山水起，都唔知點解？」雖然二人經常有意見分歧，但做事的認真卻令他佩服。
至於黃霑的另一位好友蔡瀾昨說：「生老病死係人生基本經歷，霑叔都活得好痛快，晚年重有一個咁年輕嘅太太。我心情冇嘢，霑叔唔鍾意人悲傷嘅。」他指雖與黃霑是密友，但當初亦不知道對方患肺癌一事：「佢太太保守秘密好犀利、好口密，我今日打畀佢，佢已經關咗電話。」蔡瀾又稱，黃霑結交女性向來很有辦法，有時會給女孩子罵上幾句，當給對方留下深刻印象後，又會躲在一個地方彈琴和作曲給對方聽，好讓對方感動。
提到當初誰構思《今夜不設防》這個節目出來時？蔡瀾說：「當年倪匡成日請我同黃霑去夜總會玩，但去到先發覺收費又貴、啲女人又醜、酒又唔係好酒，傾吓傾吓就諗如果有個節目俾我哋三個人，請啲靚女上嚟、飲好酒就更好啦，所以就去同周梁淑怡傾，結果一傾即合。」
蔡瀾續說，認識黃霑已有二十多年，當年他在邵氏工作，黃霑成立了一間配樂公司：「我係去搵佢幫手做配樂所以識嘅，佢個人好坦白，成個大細路咁，但係佢有一個特點，就係好鍾意喺人前提起以前嘅女人，我第一次見佢，佢已經同我講：『我好掛住華娃。』我就同佢講：『你唔應該逢人就講懷念以前啲女人，過咗去擺喺心就算，你又唔知我乜嘢人，講嚟冇益。』佢雖然一生人口花花，但係對愛情其實好執着。」
當年亞視高層、有份拍板《今夜不設防》節目的現任立法會議員周梁淑怡表示，十多歲時已認識黃霑，更笑言丈夫在未識她之前，曾與黃霑一起追女仔，而自己在家計會工作時，也有叫黃霑幫她寫宣傳歌，就這樣催生了膾炙人口的《兩個夠晒數》，到後來拍攝拍金庸的小說，黃霑也有助她從中牽線。周太又說，最後一次見黃霑是在今年三月的藝術節活動上，對於病情，黃霑當時還滿不在乎地說：「閰羅王唔收我！」
