個市叫做大漲小回，恒指跌26點。滙控（005）除息，拖低恒指54點。唔計呢條數，恒指實際仍有進帳28點。國企靚啲，國指升34點，收4935，上破月中頂位，估計會再造好啲。
中鋁C輪：國企輪流郁，廣深鐵（525）升8.1%，中電信（728）升2.7%。中鋁（2600）近排反覆靠穩，昨收4.875元，跌1格，月中見過5元，隨時上破5元，破位整多三兩毫子上去，揸C輪又有銀両落袋。好似昨日推介國壽C輪2143原理，炒C輪唔係博正股大升帶動，博升幾格就已經夠數。博中鋁上幾格，揸輪即有機會賺一兩分錢利潤。
中鋁C輪多數數據麻麻，或者成交唔勁，最大成交嘅係2167，有56球易手，銀碼超過25球，收43.5仙，跌2.5仙。隻輪明年1月到期，溢價9.4%，槓桿率11.2倍（有效5.8倍），引伸波幅55.3%，用嚟短炒啱晒。
華能C輪：國指上升，華能（902）係小小功臣，收6.30元，進帳1格。個市或者國企股到咗咁上下，華能就會有啲異動，睇嚟異動時刻來臨，搵華能C輪炒，搵銀之道。
最佳對象係熱門貨4501，57球易手，段段有成交，明年6月到期，輪價46仙，溢價7%，槓桿率13.7倍（有效6.5倍），引伸波幅29.1%。
電盈C輪：電盈（008）旗下盈大地產（432），搞咁多嘢，市場有反應，收2.825元，升10仙。電盈冇郁，估計遲吓都會因為個仔生性而有啲動靜，買定電盈C輪。想買賣易，揀9814，想揸耐啲，則揀4664。
章盛