早排嚟過香港開騷嘅英國搖滾樂隊Placebo，主音Brian曾大鬧Westlife啲歌係垃圾，而樂隊低音結他手Stefan早幾日接受我大口羅拉越洋電話訪問嗰陣，亦都話成日睇到啲由流行歌手演出嘅MV好低級，所以佢哋對自己嘅MV要求好高，喺新歌《TwentyYears》個MV入面，啲舞蹈員重要跳舞跳到好似《臥虎藏龍》入面啲功夫咁犀利。
Placebo最近推出咗精選CD同DVD，總結呢八年嘅音樂生涯，身處英國嘅Stefan喺電話度話，佢哋同過好多出名嘅MV導演合作，好似早期《36Degrees》個MV就係由名導演ChrisCunninghum操刀，Stefan話嗰陣導演要佢哋喺大水池度夾Band，唞氣時要游上水吸氧氣筒，係拍得最辛苦嘅MV。
不過，佢哋拍新歌《TwentyYears》嘅MV就輕鬆得多，Placebo三位成員只係打扮靚靚上鏡，而啲舞蹈員就好落力，跳舞跳到好似打功夫咁勁，Stefan話：「呢首歌唔止充滿維多利亞時代嘅懷舊氣息，啲動作場面、布景同色彩都好有《臥虎藏龍》味道㗎！」Stefan重話入行以嚟最開心係可以同大衛寶兒（DavidBowie）以及TheCure嘅RobertSmith等前輩同台表演。