楊千嬅最近被指向經理人黃柏高施壓，要求對方為她爭取無綫「最受歡迎女歌手」一獎，否則將不會續約。千嬅的勁敵容祖兒對此表示只會做好本份，並笑說：「食條蕉，迎新招」實行以此來對抗千嬅。
楊千嬅、古巨基、容祖兒（Joey）和黃家強前晚在將軍澳錄影無綫節目《粵港澳安全智識競賽》。對於有報道指千嬅「出茅招」向經理人黃柏高施壓，要求他爭取無綫「最受歡迎女歌手」獎，若失落此獎項，她將不會續約。千嬅對此否認說：「我舊年先簽約，咁快約滿咁大件事，我都唔知可以咁計，都入行九年，我都唔知點出茅招，我平常心去面對頒獎禮。」
千嬅續說：「柏高嘅經理人公司好有規模，佢唔會為楊千嬅放棄任何人，只會為藝人爭取，我老闆（指黃柏高）唔會俾人威脅到，老闆以為藝人爭取利益做大前提，佢係成功經理人，好多藝人慕名簽佢，我都係其中一個。」
報道亦指因千嬅的施壓，令同是黃柏高旗下的古巨基得獎機會大大減少，基仔說：「頒獎禮只睇工作表現而去派成績表，大家唔好揣測咁多，我哋公司個個都好團結，我今年都好有信心。呢個只係茶餘飯後嘅問題，我哋互相支持對方。」
Joey對於千嬅被指出茅招一事說：「我唔信呢啲嘢，我都喺呢行咁耐，冇必要證明乜嘢，藝人比較被動，只係想做好自己手頭上嘅工作，同賣好唱片。」問Joey可會出招爭取獎項？她笑說：「食條蕉，迎新招，我會做好自己，叫公司幫我爭一份。」談到不少歌手以續約為條件向公司施壓，Joey說：「我簽咗十五年，一世都係呢間公司，我出名乖巧。如果攞唔到獎，就代表明年冇碟出，我就一定爭到底。」
此外，千嬅昨又到旺角出席護膚品宣傳活動，晚上則到銅鑼灣出席聖誕亮燈儀式，還獲贈鑽石皇冠，她表示聖誕要在工作中度過。
