無論潮流係咪興復古，RolleiFlex呢部「古董」數碼相機MiniDigi，仍然係近期至最搶鏡一部DC，外形十足十攝影發燒友所喜愛嘅古董雙鏡反光機，手工設計非常精細，用起上嚟更非常有Feel，筆者玩慣數碼相機，一拎上手仍然會大叫過癮，外表傳統，但內裏更包含有最新攝影科技，可算係另煩CrossOver！
記者：許福合 攝影：陳偉強 ImageGirl：Carman
這類雙鏡反光機可以話相機中嘅經典，於1929年面世，除咗係早期一般人所能用到嘅攝影器材外，更曾經拍下唔少經典相片，地位非一般相機可取代。據行內人士表示，現時一般保養良好機款，約需6至8千元，相信非一般玩家會考慮，不過想玩得過癮，又可享受到數碼相機嘅便利，這部RolleiFlexMiniDigi就係一個唔錯嘅選擇。
Profile
感光元件：200萬
記憶：SD/MMC卡
LCD：0.9吋
電源：CR2
體積：43×73×45mm
重量：約100g
MiniDigi最令發燒友心動嘅，係造型非常逼真，同原型雙鏡反光機可以話有九成相似，最經典當然係機面前雙鏡頭設計，更係招牌之一，另一個特徵，打開機頂機蓋，原本係ViewFinder設計，現在就換成一個0.9吋LCD，雖然質素可以話同一般手機畫面差唔多，但由於四面有蓋遮擋，戶外使用問題不大。右面菲林拉桿當然亦不會缺少，而左面嘅測光鍵等雖然係假掣，不過都無馬虎，一樣可以「手動」轉動，整體上非常逼真，機上文字、刻字都跟到足，與大機拍埋比較，真係以為係一大一小兩個型號，難分真假。
除咗外形逼真外，其實連操作方式都跟足晒，基本轉變只係LCD代替Viewfinder，鏡頭下設有2個按鍵，右面係快門掣，而左面就相片重溫，拍攝時需要用家「低頭」，而最經典設計之一，係每張相片拍完後，都要與古董雙鏡反光機一樣拉菲林，一圈一格，非常頂癮！否則就不能拍下一張相片，不過當然這些動作都只係「做樣」，數碼相機何來菲林呢。
MiniDigi使用200萬像素CMOS，同原相機設計一樣，未設有變焦功能，記憶卡可使用SD或MMC卡，而電源則使用CR2電芯，替換都算方便。最為不同可算係機背，按鍵主要係睇相之用，包括前後等按鍵，都係古董機未有嘅功能。
若果單從功能規格上去睇MiniDigi，無論從拍片質素到功能，與新一代DC都難相比，不過MiniDigi明顯針對一班相機發燒友而設計，既可滿足到攝影樂趣之餘，又可免去菲林嘅麻煩，因為部份古董雙鏡反光機所採用菲林款式已經退役，只可以得個擺字，而MiniDigi外形酷似，機身又夠迷你，攜帶方便，將會大大提高其收藏價值，尤其係家中已經擁有一部古董相機，將MiniDigi放埋一齊更係好玩，當做裝飾都唔錯。
捷成洋行
查詢電話：29262320
Peter機齡15年以上現時擁有3部RolleiFlex古董雙鏡反光機：「雙鏡設計會給人有地位、傳統、專業感覺，MiniDigi同樣有這個味道，而手感到操作都好有ClassicFeel，唔似得現時數碼相機，用落似儍瓜機。這個外形設計太過經典，作為發燒友一拎上手，只能說愛不釋手！」
RolleiFlexMiniDigi的原型機，取材自RolleiFlexTLR；講到此機最風光的年代，都可算是60年代，基本上當時的新聞記者都人手一部，機價大概為350美金；望落好似唔係好貴，但須知當年三部RolleiFlexTLR嘅價值，已經可以買入一個美孚中型單位，所以老一輩的攝影發燒友，真係一直都係得個「恨」字；講到此機，不得不提佢嘅雙鏡頭設計，上面的鏡頭主要是作觀景之用，下面的鏡頭才用作影相，好處是它使用了鏡間快門（快門設在鏡頭內），要拍照時只會一開一合，唔似現代的單鏡機會有「反光鏡」的拍動，因此震動會特別小，所以就算使用「慢快門」，都會有良好的拍攝效果。
MiniDigi機身傳統外，其實迷你亦係一大賣點，以下就係價錢相近，流動性又高嘅DC一覽。
PentaxOptioS40用咗自家開發SMC鏡頭，具備400萬像素及3倍光學變焦，加內置9種預設拍攝模式，拍攝容易。
規格：400萬像素CCD、3倍光學+2.6倍數碼、內置11MB，SD/MMC
RicohCaplioRX可以拍攝28mm廣角，就算多人一字排開都唔怕影唔晒，外殼更換上金屬機身，摸上手更硬正耐用。
規格：334萬像素CCD、3.4倍光學+3.4倍數碼、內置8MB、SD/MMC
三星U-CA3特設有「3DAvatar」，可將所拍攝嘅人像進行立體化處理，同時亦可加入MP3製成一連串連環影像，並可自設調校人像服飾、配襯飾物、髮型、膚色以及面形調整等。
規格：330萬像素、3倍光學+3倍數碼、MSPro/MSDuo
三洋A5配合潛望式光學變焦鏡頭，即使薄身機仍可提供2.8倍光學變焦，而數碼變焦則為4.3倍。
規格：500萬像素、2.8倍光學+4.3倍數碼、SD/MMC卡
（a）捷成洋行（29262987）
（b）麗確攝影器材（22925111）
（c）SAMSUNG（28626008）
（d）三洋電機（21936528）