霑叔病逝，不少圈中人大感歎息，自稱當年曾被霑叔追求的白韻琴，以及霑叔生前好友陳淑蘭昨日均泣不成聲，對這位摯友的回憶歷歷在目。白姐姐在訪問中含着淚說：「佢可以令人好開心……永遠唔可以忘記佢……呢生人未試過咁甜蜜……」
陳淑蘭：我同霑叔嘅相處嘅美好回憶真係不能盡錄，我同曾華倩、江欣燕都當霑叔係契爺。記得當年我想追祁文傑，霑叔重教我話女仔要矜持，唔可以咁猴擒，結果都追到祁文傑。早排本來話同霑叔食大閘蟹，都係自己懶，唔的起心肝去約，𠵱家冇機會。
鄭裕玲：我之前都有同啲舊同事約過霑叔一齊食飯，但霑叔有幾次都婉拒咗，佢可以講得係我司儀同主持上嘅老師，我參加訓練班時係霑叔教司儀，當時佢重點名讚我，霑叔博學多才，見解獨特，呢個係佢吸引人地方，所以不論同性異性他都好受歡迎。
白韻琴：一日唔見兩個老友（專欄作家林冰和黃霑），就嚟輪到我。我七一年識霑叔，佢可以令人好開心，永遠唔可以忘記佢，我識咁多人都冇一個可以用咁多心機𠱁人開心，佢可以為你填詞、作曲、唱埋畀你聽都唔淨止，我試過一日打開門五次有五封信，打開門又有人為你唱歌，我呢生人都未試過咁甜蜜感覺。
陳潔靈：上一次見霑叔係舊年十一月林振強嘅喪禮，佢話唔鍾意嚟呢啲場合。同霑叔喺煇黃演唱會同麗花皇宮合共二百場。最鍾意佢首《明星》，雖然呢首歌唔係寫畀我，不過喺佢演唱會唱過，之後霑叔寫了一封信讚我，我認為是一位歌手的最高評價。佢係鬼才，浪子，作品往往看透世情。
張敬軒：兩個月前撞到黃宇詩，講開想搵霑叔填詞，佢就話幫我試吓搵佢，之後我做好demo就交畀黃霑太太，估唔到第二日霑叔就話肯幫我填詞。雖然三個禮拜至交詞，但就係霑叔親筆寫嘅手稿。我當時打電話畀霑叔，話好鍾意佢嘅詞，重叫佢保重，霑叔當時重話「我會㗎，我都未想去住，你一定要畀心機」。
張堅庭：我以前都上過霑叔主持嘅節目，印象之中，我覺得霑叔一向好肯幫人，好提攜後輩嘅長輩，佢撰寫嘅作品《不文集》風趣幽默，對後輩影響深遠。霑叔因為肺癌而死，亦提醒大家唔好食咁多煙，始終對身體唔好，最好戒煙。
曲：顧嘉煇 詞：黃霑
主唱：陳潔靈
同聚暢飲今晚夜
莫理今宵 星稀月也斜
尋樂暢萬花嬌俏
知否明天一過花就會謝
同樂碰杯今晚夜
就趁美酒芬芳香四射
能盡慶就開心笑
知否明天一到花亦會謝
採訪、攝影：卓寶花、胡比
