三十多年來黃霑與顧嘉煇合作無間，這對金牌組合原來是前輩歌手潘迪華一手撮合，七一年潘迪華找任職廣告公司的黃霑為舞台劇《白孃孃》填詞，結果由顧嘉煇作曲、黃霑填詞的《愛你變成害你》一鳴驚人。
前輩歌手潘迪華於七十年代時，投資舞台劇《白孃孃》，該劇由她與已故台灣歌手鮑立及森森主演，顧嘉煇則負責創作音樂。由於潘迪華思想前衞，希望在舞台劇歌詞方面可以創新一點，所以便四出物色理想人選，在一位廣告界好友大力推薦下，她起用了對方旗下員工黃霑創作歌詞。
潘迪華昨日接受訪問時說：「黃霑未紅時，喺廣告公司工作，當時咁啱我朋友係廣告公司老闆，佢話黃霑好有才華，為好多廣告歌填詞，叫我試吓搵佢幫手，顧嘉煇都話好。」
潘迪華續說：「黃霑冇錯係好有才華，好激情，自信心亦好強，一有唔高興就即刻發洩出嚟，而我就係一個有規律嘅人。我哋傾好晒合作，顧嘉煇亦一早寫晒歌，但黃霑竟然成四、五個月都交唔到歌詞畀我。由於時間好緊迫，於是我就去台灣再搵人填詞。我返到香港之後，黃霑走嚟鬧我，話我唔尊重佢，我好唔開心，覺得佢太任性。結果一個星期之後佢交歌詞畀我，啲歌詞好過晒台灣嗰邊嘅人，所以我就起用咗大部份黃霑嘅歌詞，其中最hit嘅就係《愛你變成害你》。」
潘迪華表示雖然她覺得黃霑太任性，在舞台劇後不再與他合作，但因為《愛》曲大受歡迎，黃霑遂展開填詞生涯，跟顧嘉煇寫下無數經典歌曲。
採訪：戴彩煥
作詞：黃霑 作曲：顧嘉煇 主唱：潘迪華
什麼是情 什麼是愛 為什麼愛會變成害
我愛你 變了害你 萬種恩情變禍災
什麼是好 什麼是歹 為什麼好會變成歹
我愛你 變了害你 千番好意竟成歪
難道世間真是孽海 三頭六臂跳不出來
難道人生只有悲哀 千恩萬愛都不存在
