【本報訊】黃霑是七、八十年代產量最多的填詞人，他對新一代填詞人影響深遠。近年作品產量不少的填詞人黃偉文表示當得悉黃霑的死訊後，心裏即強烈要求自己做三件事，一是生活得更開心，二是把每一首歌詞寫好，三是盡可能少抽煙。
黃偉文昨日在電話中說：「相信香港所有填詞人都有受霑叔影響，霑叔嗰啲係潛移默化，入咗血管裏。」他表示最欣賞黃霑一些小品式作品，以及他靈活運用地道廣東話，黃偉文說：「好似《問我》、《明星》呢啲好簡單直接，我十幾歲時就係聽咗《明星》，就立志第時要填歌詞。而佢作品嗰種豪氣干雲亦係後無來者，邊個可以寫到《滄海一聲笑》呀？」
黃偉文續說：「記番起當年我已經開始填詞，有次我喺TVB化妝間見到霑叔，佢竟然主動走埋嚟同我講：『我睇過篇訪問，聽講你係冇錢仔嚟，自己努力自學，我最欣賞呢種人，我自己都係冇錢仔。』我當時聽到有前輩同我講呢番話，第一個感覺係：『終於有人明白我』。」
而另一填詞人陳少琪昨日亦說：「佢除咗歌詞外，又吹口琴、彈鋼琴、作曲、話劇、編劇，連喺電影方面都見到佢，我諗冇一個文字工作者可以做到咁多嘢。」