深夜接到潮界經紀大隻標來電，呼吸急促：「大件事！裏原宿大地震呀！」東京將有地震傳言已流傳咗好幾個月，𠵱家終於發生，有乜咁奇？大隻標聽後立即解釋：「我講緊唔係路面地震，而係裏原宿集團發生公司大地震！根據可靠消息，上個禮拜日本政府有調查員大舉出動，親身去到裏原宿搵班設計師傾偈，聽講係調查稅務同資金問題，呢次行動對於裏原宿平時好瀟灑、好玉樹臨風嗰班設計師嚟講，真係嚇到佢哋鼻哥窿都冇肉；你知喇，日本人好怕惹官非，同我哋中國人傳統嘅生不入官門思想非常相似，希望佢哋早日解決問題，冇乜事就繼續創作喇！不過圍內人將今次件事矛頭直指同門設計師金牙佬。自從金牙佬近年轉玩嘻哈之後，行為愈來愈出位，風頭愈來愈勁！連日本狗仔隊爆料雜誌都偷影佢做封面故事，爆埋佢一年搵過千萬；班同門咪話全因為佢，令日本稅務局對裏原宿呢個小圈子發生興趣，查晒成個字頭囉！不過話分兩頭，金牙佬亦帶挈過唔少同門上位，亦有份推動日本StreetFashion呢瓣嘢，唔可以乜都賴晒佢。其實自問平時執得正，又怕乜人哋查啫？」大隻標甚有道理。
主持人：大食Jack
八卦熱報：