【本報訊】黃霑除對音樂有濃厚興趣外，對電影亦有一份理想，他曾執導的電影有七十年代的《大家樂》和《天堂》等，而演出的電影中，大部份均是與高志森合作，兩人關係亦師亦友，高志森昨對黃霑病逝消息顯得極度傷心。 記者：羅慧敏
高志森昨在港台接受陳淑蘭訪問時，兩人一碰面就抱頭痛哭，他指黃霑為人豁達，經常給他不少鼓勵，可說是他的精神支柱，所以在心中完全不覺對方已離開，黃霑仍活在其心中。
高志森解釋，黃霑患病後對病情如此低調，主要是因為不想一班朋友為他感到難過，故當他病逝的消息傳出後，大家都顯得措手不及。高志森又證實，昨晨前財政司司長梁錦松及沈殿霞都先後打過電話給他，求證黃霑的死訊。
黃霑在抗癌期間，曾對高志森說：「世事無常，要珍惜眼前人。」高志森希望大家能夠對霑叔此番話有所體會。早陣子，他曾致電黃霑，發現對方身體有點兒不適：「我原本想話去探佢，但霑叔話唔好啦！因為佢有幾聲咳，唔係咁舒服，佢都好少出街，只係去行山，但諗唔到……。」
高志森說：「我同霑叔一向保持亦師亦友嘅關係，喺佢愛情同經濟最失意時，我就搵佢合作拍四部戲，當時我知佢手緊，所以我就一次過將佢幾部片嘅片酬，親自送到佢屋企，佢攞住嗰張一百萬嘅支票，竟然跪咗喺我面前，話咁大禮點受得起，所以我即刻跪番低。」
高志森又認為，黃霑雖然離去，但卻留下不少優秀作品，大部份都可以雅俗共賞。他已應黃霑家人的要求，協助辦理黃霑的喪禮：「暫時我係對外發言人之一，至於會唔會做治喪委員會成員，就要由佢屋企人決定，至於喪禮安排，今日重未有定論。」
高志森續表示：「噚晚兩點鐘知道消息後，一路都瞓唔到，但係都要平復。其實喺我睇法裏面，霑叔冇離開到，乜嘢叫離開呢？係直至冇人記得你，咁你先可以叫離開，我哋每個香港人都會記得佢啲曲、佢啲詞、佢寫嘅書……。」
而被問到會否創作一部紀念霑叔的舞台劇時，高志森說：「暫時我未諗到咁遠，佢嘅作品對我哋嚟講影響好深遠，到𠵱家我都接受唔到，因為十幾年嚟，佢喺精神上係我嘅支柱，無論事業同我嘅人生、無論高潮同低潮都同我分享，佢畀我好多意見，好多分析，好多啓示，好多道理，我都唔會忘記，我接受唔到佢嘅離開，佢係活喺我身邊。」
過去，高志森與黃霑曾合作的電影包括有《大富之家》、《不文大丈夫》、《不文騷》、《銀座嬉春》、《偷情先生》、《花田囍事》、《南海十三郎》及《我和春天有個約會》等，而他最後演出的遺作《我的大嚿父母》也是跟高志森合作的，至於他參與配樂的電影亦不計其數，最膾灸人口的莫過於《倩女幽魂》、《黃飛鴻》、《笑傲江湖》及《上海之夜》等。
